hkkurdistan
گفتوگۆ لەگەڵ خەسرەوسایە، سەرۆکی مەکتەبی سیاسی حزبی کۆمۆنیستی کرێکاریی کوردستان
ئۆکتۆبەر: بەدوای سەرهەڵدانی خۆپیشاندانی شارەکانی ئێران، جمهوری ئیسلامی دەستی داوەتە تۆپبارانی ناوچە سنوریەکانی هەرێم و بۆردومانکردنی بنکەو بارەگای ئەحزابی ئۆپۆزسیۆنی نیشتەجێ لەهەرێمی کوردستان.. بۆچی جمهوری ئیسلامی ئێران لەئێستادا دەستی بۆ کارێکی لەمجۆرە بردووە و بەشوێن چ ئامانجێکەوەیە؟
خەسرەوسایە: سەرەتا ئەوە بڵێم ئەم هەنگاوەی جمهوری ئیسلامی ئێران، بەشیوەیەکی گشتی ڕەنگدانەوەی ئەو فەزا میلیستاریستی و گێژاوە سیاسیەیە کە بەهۆی نادیاری لەیەکلابوونەوەی کێشە جیهانیەکانەوە دەولەتانی ناوچەکەی لەپاڵ هەبوونی قەیرانێکی حکومەتیدا، بەرەوڕووکردۆتەوە. بەلام ئەوەی کە بۆچی جمهوری ئیسلامی ئێران لەمکاتەدا دەست بۆ تۆپبارانی ناوچە سنوریەکان و بۆردومانی بنکەو بارەگای لایەنە ئۆپۆزسیۆنەکان دەبات، بەدیاریکراوی بۆ ئەو دۆخە دەگەرێتەوە کە لەناوخۆی ئێراندا سەری هەڵداوە، دۆخێک کەجوڵانەوەیەکی جەماوەری بە خواستی ڕوخانی ڕژێمەوە پێیناوەتە مەیدانەوە و چارەنوسی ئەم ڕژێمەی خستۆتە بەردەم مەترسی داروخانەوە. بەمجۆرەش دەمەوێت بڵیم کە دەستدرێژیە سەربازیەکانی ئەمجارەی جمهوری ئیسلامی ئێران ڕاستەوخۆ پەیوەندی بەم ناڕەزایەتی و جولانەوە جەماوەریەوە هەیە.
بێگومان ئامانجیش لێی ئەوەیە کە سەرنجی ڕای گشتی جیهان و ناوچەکە بەرەو لایەنی دەرەکی بگوڕێ و وا نیشان بدات کە ڕووداوەکانی ئێستای ناوخۆی ئێران، دروستکراوی دەستی دەرەکیە و حزب و لایەنێک کە لەسنورەکانی هەرێم نیشتەجێن و خۆیان بە ئۆپۆزسیۆنی ڕژێمی ئیران دەزانن، پیلانی نانەوەی ئاژاوەیان لەناوخۆی ئێراندا سازداوەو بەوهۆیەوە خەڵک لەدژی ڕژێم ڕژاونەتە مەیدانی شەقامەکانەوە!.. ئامانجێکی تری جمهوری ئیسلامی ئێران، لەمکارەیدا ئەوەیە کە ڕیشەی ئەو قەیران و نابەرابەری و ستەم و زۆرە و ئەو سەرکوتگەری و تاوانەنە داپۆشێت کە زیاتر لەچل ساڵە قوربانی لەخەلكی بێتاوان وستەمدیدە ئێران دەسەنێ. وە هەروەها دەیەوێت بەم دەستدرێژیە سەربازیەی بۆسەر هەرێم هێزو نفوزی ناوچەیی و دەخاڵەتی سەربازی خۆی نیشان بدا و لیرەشەوە تواناو قابیلیەتەکانی ئەو بزوتنەوە جەماوەریەی کەیەخەی پیگرتووە بەکەم وناچیز لەقەڵەم بدات.
ئۆکتۆبەر: لەبەرامبەر ئەم دەستدرێژیانەی جمهوری ئیسلامی ئێراندا بۆ سەرهەرێم، هەر یەک لەپارتی و یەکیەتی، حکومەتی عێراق و ئەمریکاو دەولەتانی ئەوروپا، بەئیدانەی ئیران و داوای ڕاگرتنی تۆپاران و بۆردومانەکان، کاردانەوەیان لەخۆنیشاندا.. ئیوە ئەم کاردانەوانە چۆن دەبینن؟ ئایا پێتانوایە سنوریك بۆ دەستدرێژیە سەربازیەکانی جمهوری ئێسلامی ئێران دابنێت؟
خەسرەو سایە: هەموو ئەو لایەنانەی کە جیگای ئاماژەیە، نەدەتوانن و نەدەیانەوێت سنورێک بۆ دەستدرێژیەکانی جمهوری ئیسلامی ئێران دابنین، بگرە بەگشتی کاردانەوەکانیان لەبەرژەوەندیە سیاسیەکانی ڕۆژانەیانەوە سەرچاوەی گرتووە، نەک داکۆکیکردن لەئارامی و ئەمنیەتی خەڵکی کوردستان و مافی مانەوەی لایەنە ئۆپۆزسیۆنەکان لەخاکی هەرێمدا. ئەمریکاو دەوڵەتانی ڕۆژئاوا، کەدەزانن جمهوری ئیسلامی لەناوچەکەدا نفوزو دەخاڵەتی هەیەو هۆکارێکی پشێویە لە ناوچەکەدا، هیچیان پێنەکراوە، چ جای ئەوەی کاردانەوەیەکی جدی نیشان بدەن لەبەرامبەر دەستدرێژیە سەربازیەکانی بۆسەر هەرێمی کوردستان. دەخاڵەتی سیاسی و سەربازی و ئەمنی جمهوری ئیسلامی ئێران لەعێراق وسوریا، لە لوبنان و یەمەن، تادەگات بە ئەفغانستان و فەلەستین، ئەوەمان پێدەڵێت کە کاردانەوەی ئەم دەوڵەتانە بەوەی ئیدانە دەکەن و داوادەکەن جمهوری ئیسلامی دەستدرێژیەکانی ڕابگرێ، ناتوانێ لەتوندکردنەوەی فشارەکانیان بۆ سەر جمهوری ئیسلامی واوەتر بڕوات تا ناچاری بکەن بەخواستەکانیان بۆ ڕێکەوتن لەسەر کەیسی ئەتۆمی ئێران. ئەمە ویرای ئەوەی کە بەکردەوە ئێران لەعێراقدا، هۆکارێکی ئەو ئاشوب و دۆخەیە کە لایەنە عێراقیەکان نەتوانن حکومەت دامەزرێنن و جۆرێک ئارامی و ئاسایش فەراهەم بکەن.
تا ئەو جێگەیەی بەکاردانەوەکانی حکومەتی عێراق لەسەر بۆردومان و دەستدرێژیە سەربازیەکانی جمهوری ئیسلامی دەگەڕێتەوە، جگە لە پڕوپاگانەدەی سیاسی لە دوتوێی “پاراستنی سەروەری خاکی عێراق”دا، شتێکی تری بەدواوە نیە. حکومەتەکەی کازمی کەخۆی لەجێگەی نەبوانە و مانەوەی وەک ئەمری واقع چاوی لێدەکرێ، ئەگەر لەمیدیاکانەوە دەستدرێژیە سەربازیەکانی جمهوری ئیسلامی ئیدانە کردبێت، تەنها بۆ ئەوەیە هاودڵیەک لەپاڵ یەکیەتی و پارتی و حزبە دەسەڵاتدارەکانی هەرێمدا دەرببڕێ، تا لەکەنار لایەنەکانی ناو بەرەی هاوئاهەنگی، کە مالیکی و حەکیم و عامری ڕابەری دەکەن، ڕاوەستن و بەشداربن لەو بانگەوازەدا کە بۆ پێکهێنانی حکومەتی تازەی عێراق دراوە. بەڵام کاردانەوەکانی یەکیەتی و پارتی لەم بابەتەدا، تایبەتی ترە:
یەکیەتی کە ستراتیژی سیاسی و عەسکەری و ئەمنی و تەنانەت بازرگانی خۆی بەئێرانەوە گرێداوە، تەنانەت نەیتوانی شەرمنۆکانەش هەڵوێستێک لەدژی دەستدرێژیەکانی جمهوری ئیسلامی دەرببڕێ و زۆرتر چاوی لەدەخاڵەتی حکومەتی عێراق و ئەمریکاو نەتەوە یەکگرتوەکان بڕیوە، ئەویش بەوحاڵەوە کەباسمان کرد. لەبارەی پارتیشەوە کەپاڵی داوە بەڕۆڵی تورکیاو دەخالەتی لەهەرێم و ناوچەکەدا، هەوڵیدا هاژوهوژێک لەسەر بۆردومانەکانی ئێران بەڕێبخات، کەزیاتر بۆ توندکردنەوەی فشارەکانیەتی لەسەر یەکیەتی و داپۆشینی پێگەی جاسوسی و سەربازیەکانی تورکیایە لەهەرێمدا. بەکورتی هەردو حزبی دەسەڵاتدار کە لەچەند ساڵی رابردوودا خۆیان دەستی دەوڵەتانی وەک ئێران و تورکیایان بۆسەر هەرێم درێژ کردوەو تاسەرئاستی پێشلەشکری و هاوکاری جاسوسی و ئەمنی ڕۆێشتون، هاوکات بەحوکمی ئەوەی بەرژەوەندیەکانی خۆیان و مانەوەیان بەستراتیژی خۆگرێدانەوە بەم دوودەوڵەتەوە پێناسەکردووە، ئیتر دەتوانن چ کاردانەوەیەکیان لەوەزیاتر هەبێت کە لەئاستی ڕاگەیاندن و پروپاگەندەکردندا تێپەرێت. بەبڕوای من ئەم دوو حزبە خۆیان لایەنێکی سەرەکی ئەو نائارامی و فەزا میلیتاریستیەن کە لەلایەن ئێران وتورکیاوە لەهەرێمدا خوڵقاندویانە.
ئۆکتۆبەر: هەڵوێست و سیاسەتی حزبی کۆمۆنیستی کرێکاریی کوردستان بەرامبەر بەم دەستدرێژیە سەربازیانە چیەو خەڵک دەبێ چیبکات؟
خەسرەوسایە: سیاسەت و هەڵوێستی حزبی ئێمە بەرامبەر بەدەخاڵەتی دەوڵەتانی ناوچەکە لەوانەش ئێران و تورکیا، ڕاوەستانەوەیە نەک هەر بەرامبەر بەدەستدرێژیە سەربازیەکانی ئێستا، بەڵکو بەهەرجۆرە وجودێكی سەربازی و ئەمنی و دەخاڵەتیان لەدۆخی هەرێمدا. واتە دەبێ کوردستان پاکبکرێتەوە لەمەوجودیەت و دەخاڵاتی سیاسی و سەربازی و ئەمنی ئەم دەوڵەتانە و بنکەو بارەگایان لەهەرێم کۆتایی پێبێت و نابێت کوردستان چیتر لەلایەن حزبە دەسەڵاتدارەکانەوە بۆ بەرژەوەندیەکانی خۆیان بکرێتە جیگای تەراتێنی سیاسی و سەربازی ئەم دەوڵەتانە. حزبی کۆمۆنیستی کرێکاریی کوردستان، کەمەسەلەی ئارامی و ئەمنیەتی کۆمەڵایەتی هاووڵاتیانی کوردستان، بە بنامەیەکی سەرەکی سیاسەتەکانی خۆی دەزانێ، کردنەدەرەوەی هێزی ئەم دەوڵەتانە و دەستکۆتا کردنیان، بەبەشێک لەخەباتی جەماوەری ستەمدیدەی کوردستان بۆ بەدەستهێنانی ئازادی و نان و کارو مەعیشەت دەزانێ. بەدڵنیایەوە هەرجۆرە دەستدرێژیەکی سەربازی و کردەوەی تیرۆریستی دەوڵەتانی ناوچەکەو فەزای میلیتاریزمیان، بەزیان بۆسەر ئەو خەبات و جۆلانەوە جەماوەریەی کەیەخەی دەسەڵاتدارانی کوردستانی گرتووە، تەواودەبێت. بۆیە حزبی ئێمە بەتەواوی توانایەوە نەک هەر بەرامبەر بە دەستدرێژی و پەلامارە سەربازیەکانی ئێران و تورکیا ڕادەوەستێتەوە، بەڵکو تێدەکۆشێت بۆ دەستکۆتاکردنی وجود و هەرجۆرە دەخاڵەتێکیان. حزبی ئێمە لەگەڵ ئەوەدا کە هەوڵدەدات دەستدرێژی سەربازی و بونی بنکەو بارەگای دەوڵەتانی ناوچەکە لەهەرێم، لەناوخۆ و دەرەوەی کوردستان ڕیسواو ناکام بکاتەوە، هاوکات تێدەکۆشێت لەڕیگای ڕیبەری و ڕینماییکردنی خەباتی جەماوەری و ناڕەزایەتیەکانیان بۆ وەلانانی دەسەڵاتی ئێستای حزبەکان و ئیرادەگرتنی جەماوەری بۆ لەئەستۆگرتنی ئیدارەی کۆمەڵگا و پاراستنی ئەمنیەت وئاسایشی هاوڵاتیان، دەستی دەولەتانی ناوچەکە لەسەر هەرێمی کوردستان کۆتابکات.
تا ئەوجێگایەی بەچیکردنی خەڵک خۆیان دەگەڕیتەوە، بەبڕوای من خواستی پاراستنی ئەمنیەت و ئاسایشی کۆمەلگا، بەشێکە لە داخوازیە جەماوەریەکانی ئێستای کرێکاران و جەماوەری بێبەشی کوردستان کەبۆ باشکردنی ژیان و بەدەستهێنانی کار و موچەو خزمەتگوزاریەکان دەستیان داوەتە ناڕەزایەتی و بەهیچ جۆرێک لێی جیانابێتەوە. بۆیە دەبێ خەڵکی ستەمدیدەی کوردستان لەپاڵ ئەوەدا کە بۆ موچە و کارو خزمەتگوزاری و ئازادیەکان دێنە مەیدانەوە، ئاواش دەبێ داوابکەن کە بنکەو بارەگای دەوڵەتانی ناوچەکە لەکوردستاندا نەمێنن. دەبێ مەیدانی شارەکان لەدژی هەر جۆرە دەستدرێژیەکی سەربازی و تێرۆریستی دەوڵەتانی ناوچەکە ناڕەزایەتی بەخۆوە بگرێ. تەنانەت لەدەرەوەی وڵاتیش لەقاوبدرێن و فشاریان بخرێتەسەر. بەتایبەتی لەئێستادا کە جمهوری ئیسلامی ڕووبەڕوی خۆپیشاندان و ناڕەزایەتیەکی گەورەی جەماوەری لەناوخۆدا بۆتەوە، پشتیوانیکردن لەم جوڵانەوەیەی خەڵکی ئێران، بەکۆبوونەوەو دەربڕینی ناڕەزایەتی لەشارەکانی هەرێم ئەتوانێ فشارێکی گەورە لەسەر جمهوری ئیسلامی دابنێ. بێگومان لەجەرگەی ئەم خەباتەدایە کە دەتوانرێ هەم ئارامی و سەلامەتی هاوڵاتیانی کوردستان و هەم مافی مانەوەی ئۆپۆزسیۆنی ئێرانی لە کوردستان بپارێزرێت.
