hkkurdistan
ڕێبوار عارف
ماوەیەکە دەبینین کەناڵی ( ئین ئار تی ) بووتە ناوەندی ستایش و پیاهەڵدانی کەسایەتی چنین پلاسخارد، نوینەری نەتەوەیەکگرتووەکان لە عێراق کە ئەمجارە خۆی سەرپەرشتی پرۆسەی هەڵبژاردنی کوردستان دەکات، بۆیە فرسەتێك هاتۆتەپێشەوە کە لەرێگای هەڵبژاردنی ئایندەوە دەسەڵات لە یەکێتی و پارتی بسەنرێتەوە!
ئەم پڕوپاگەندەیەی( ئێن ئاڕ تی) و نەوەی نوێ، ئەو ئامانجەی هەیە بەخەڵك بڵێت دەنگ بدەن بە ئێمە و لەرێگای دەنگدانەوە دەتوانن دەستاودەستی دەسەڵات بکەن و بەوجۆرە سزای دەسەڵاتی گەندەڵی یەکێتی و پارتی بدەن کە ساڵانێکی زۆرە ستەمتان لێدەکەن و نانی سەر سفرەتان تاڵان دەکەن. گومان لەوەدا نیە کە ئەم پڕوپاگەندەیەی نەوەی نوێ بێجگە لە چەواشەکاری و خۆڵکردنە چاوی خەڵك شتێکی دیکە نیە. بەڵام با وادابنێین کە نەوەی نوێ لە هەلبژاردنی داهاتوودا چوار، نەخێر دەو پانزە پەرلەمانتاری تری زیادی کردو بووە هێزێکی بەرچاوی نێو هاوکێشە سیاسیەکان. بەلام ئایا لەهیچ ڕوویەکەوە هێشتا دەتوانن ببنە هێزێکی وەکو بزوتنەوەی گۆران و کارەکتەرەکانی بگەنە ئاستی کارەکتەرەکانی نێو ئەو بزوتنەوەیە کە بەشێکیان ئەزموونی دەیانسال کێبەرکێ و حزوری سیاسیان لە کۆمەلگای کوردستاندا هەبوو!؟ ئەو بزوتنەوەی لەسەردەمێکدا٢٥ کورسی بەدەستهینا کە زیاتر لە٧٠٪ ی خەڵک هێشتا خۆشخەیالی سندوقی دەنگدانەکان بوون. بەلام کوا ئەو بزوتنەوە بەهێزەی کە بووە دووهەم هێزی کوردستان!؟ کوا ئەو حیزبە سیاسیەی کە دەیان کادری ناسراویان لە ئاستی شار و شارۆچکەکانی کوردستاندا هەبوو!؟ کارێکیان پێکرا!؟ نەخێر. گریمان نەوەی نوێ سنووری جێگەوڕێگەی بزوتنەوەی گۆڕانیش تێدەپەڕێنێت و ئەبێتە نەیاری سەرەکی پارتی، بەلام بەم نەوە نوێیەی بێچەک و بێ بەرنامەو بێ ستراتیجی سیاسی و بێ ئایدیاو ئایدۆلۆژیایە چی پێدەکرێت و چەندە خۆشخەیال بوون بە ترازانی پێگەی گۆران دەتوانێت خەونێکی کردەی و هیوابەخش بێت بۆ خەلکی کوردستان؟!
ئەزموونی تائێستەی دەسەلاتداریەتی سیاسی لە ماوەی ٣١ سالی رابردودا ئەوەمان پیدەلێت کە ئەم حیزبانەی نێو پەرلەمان بەسەر دوو بەرەدا دابەش بوون، کە بزوتنەوەی کوردایەتی و ئیسلامی سیاسی یە بەهەموو حیزب و ریکخراو کەسایەتیەکانیانەوە. نەفرەت و بیزاری خەلک لەم هێزانە سەرئەنجام بەوە گەشتووە کە ٨٠٪ ئەو خەلکە بێئومید بوون و لە بێزاری زیاتر شتێکی تریان نیە بۆ ئەم لایەنانە، چونکە خەڵکی نانی دەوێت، ئاو و کارەباو سووتەمەنی دەوێت، مووچەو کارو بیمەی بێکاری دەوێت، خویندنی خۆرایی و بیمەی تەندروستی دەویت، ئازادی و بەهای ئینسانی مافە سەرەتایەکانی خۆی دەوێت، کە جەنگی بەدەستهێنانی ئەم مافانە حیزب و هێزی سیاسی و بزوتنەوەی کۆمەلایەتی جیاوازی دەوێت. دەخالەت و کاری سیاسی و دەسەلاتداریەتی جیاوازی دەویت، کە لەهیچ لەو حزبانە نەک هەر بەدی ناکرێت. بەتایبەت ئەم نەیارە نەقیزە وەشنیە کە ڕێك پێچەوانەی ئەم ئاسۆو ئامانجەی خەڵك کاردەکات و نامۆیە بە ژینگەیەکی شۆرشگیرانە کە بتوانێت ئالوگۆڕ لە کۆمەلگای کوردستاندا پێکبهینت!
هەقیقەت ئەوەیە کە قورقوشم بەسەر نەوەی نوێدا بتوێنیتەوە لە پشت بەستن بە نەتەوەیەکگرتووەکان و ولاتانی زلهێزی دنیا زیاتر شتێکی تری لێدەرناچێت. ڕاستیەکەی ئەوان خۆشیان ئیدعایەکی زیاتریان نیە لەوەی کە چۆن لە دەرفەتیکدا ئەم هیزە نیودەولەتیانە دەست بنینە بنباڵیان و لەسەرگوشەی کورسیەک دایانیشینن. بەپێی خاسیەتی چینایەتی نەوەی نوێ، ناتوانێ پشت ببەستێ بە رێکخستن و هێنانەمەیدانی هوشیارانەی خەڵك بۆ ئاڵوگۆڕی دەسەڵات، بۆیە هەردەبێ چاو لەو هێزو دامەزراوە بۆرژواییە ناوچەیی و جیهانیانە ببڕیت کە لە ستراتیژی سیاسی خۆیاندا جێگایەکی بۆ قایل ببن و بەشێکی لە کێکی دەسەڵات لە کوردستان پێببەخشن!
کێشەکە لەوەدایە کە نەوەی نوێ بەمانەشەوە ڕاناوەستێت و لە دواین دەرکەوتنی سەرۆکەکەیاندا تازە دەیانەویت بە نەقیزە ئەم دەسەلاتە بگۆڕن و گوایە ماف و داواکاریەکانی خەلکی بەدەست بهینن! بەلام لەراستیدا ئەم رەوشە تەنیا خۆشخەیالی و فریودان و گەوجکردنی ئەو خەلکە نیە، بەلکو زۆربەداخەوە ئیدعای نەقیزە وەشاندنەکانی شاسوار بۆ جووتەدانە لەو خەلکە نارازیەی کە زیاتر لە دوو ساڵە هاتووەتە مەیدان. شۆفیرەکانی کوردستان دەیان خۆپیشاندان و مانگرتن و ڕێگرتن و نارەزایەتیان دەبریووەو ئەوان خولقینەری هێنانەمەیدانی شیعاری بەنزینی ٥٠٠ دیناری بوون. چەندین کەسیان لێ دەسگیرکراو ئازارو ئەشکەنجەی هەلسوراوانیان دراوە، کەچی کاک شاسوار خۆی و نەوەی نوی دەکاتە قارەمانی پاشەکشەپێکردنی دەسەلات. دەوێت بلێت ئێمە هەر بەم نەقیزانەی دەستمان پاشەکشە دەکەین بەم دەسەلاتە سەرکوتگەرە. بێخەبەر لەوەی کە نەقیزەوەشێن لەنێو ڕیزەکانی ئەم حیزبانەدا خۆشیان کەم نەبوون!
لەراستیدا ئەو کارەی نەوەی نوێ دەیکات و رەنگە بۆ زۆرکەسیش جێگەی پرسیار بێت کە چۆنە دەسەلات ڕێگە بەم شالاوانە دەدات، تەنیا لەبەرئەوەیە کە دەسەلات دلنیایە لەوەی نەوەی نوێ لەهیچ سەردەمانێکدا ناتوانێت بێتە جێگەی مەترسی بۆیان و بە پێچەوانەشەوە شاسوار بەم کاروکردەوانەی شوێنێک پردەکاتەوە کە هاوکێشەکە لەبەرژەوندی دەسەلاتدایە. چونکە تەواوی کاری ئەم لایەنە بووەتە ئەوەی کە چۆن پێش بەخۆریکخراوکردن و هاتنەمەیدان بۆ بەرێخستنی یەک بزوتنەوەی شۆرشگیرانە لەخوارەوە بۆ سەرەوە بگرێت. چۆن لە ڕێگەی دروستکردنی پردێك و دابینکردنی چەند هەزار لیترێك نەوت و بانزینەوە ئەو خەلکە ناڕازیە بنیریتەوە مالی خۆیان و بەکردەوە پرۆسەی هاتنەمەیدانی ئەو خەڵکە نارازیە پەك بخات!
هیچ کیشەیەکی تیدانیە تۆ دەتوانیت وەک شاسوار بازرگان بیت و سیاسەتیش بکەیت، بەلام ئالوگۆری بنەڕەتی لەناو کۆمەڵگادا حیزب و ئامانجی سیاسی و بەرنامەو ستراتیژیکی رۆشنی دەویت بۆ رابەریکردنی کۆمەلگاو وەلامدانەوە بە ئەزمەو قەیرانەکانی. حیزب و حیزبایەتی بنەماو بەرنامەو ریبازێکی سیاسی دیاریکراوی دەویت کە لەخوارەوەی کۆمەلگا ئیلهامی گرتبێت و هەر ئەوانیش وەک هەوێنی هەرجۆرە ئالوگورێکی ریشەیی لەقەلەم بدات.
بۆیە تاکاتیک نەوەی نوێ نایەویت و ناتوانیت دەست بۆ ریشەی کیشەکان بەریت، ئەو هیزە بە کاراکتەری هەرجۆرە ئالوگۆریک پیکبهینت کە دەیەویت لەخوارەوە لەنیو جەرگەی ئەو هیزەوە سەرهەلبدات کە ٨٠٪ی دەنگی نەدا بە پەرلەمانەکەی کاک شاسوارو حیزبەکانی تر ، ئیتر مەحالە دلخۆش بوون بەکردەیەک کە زۆربەی هەرەزۆری خەلکی کوردستان بە ماف و داواکاری و ئازادیەکانی خۆیان بگەیەنیت.
بەلام هەقیقەت ئەوەیە کە قلشتی کۆمەلگای کوردستان قلشتیکی چینایەتیەو بە زیادبوونی ژمارەی دەستەو حیزب و ریکخراوە سیاسەکان پرنابیتەوە، بەلکو تەنیا بەهاتنەمەیدانی ئەو بزوتنەوە سیاسی یە پردەبیتەوە کە ناسنامەیەکی ئینسانی هەیە لە خوارەوە لەگەرەک و کۆلان و شوینی کارو خویندنگەو شەقامەکانەوە دینەمەیدان و خۆیان ریکخراو دەکەن و لە دەوری ئامانجێک کۆدەبنەوە کە بیتە هەوینی رزگاری هەمیشەیان لەم هەموو زولم و ستەم و چەوسانەوەی کە بەشیوازی جیاوازو لە ریگەی جیاوازەوە دژ بەو خەلکە دەکریت، ئەمەش تەنیا کاتیک دەتوانیت مانا پەیدا بکات کە جولانەوەیەک لە خوارەوە بۆ سەرنگونکردنی سەرەوە بکەویتەرێ.
