hkkurdistan
پەسەندکراوی کۆنگرەی پێنجەمی حزبی کۆمۆنیستی کرێکاریی کوردستان
– لەژێر کاریگەری هەلومەرجی جیهان و ناوچەکەدا، کوردستان لەبەردەم دەورەیەک لە ئاڵوگۆڕی تازەدا قەراری گرتوە. کشانەوەی ئەمریکا لە ناوچەکە و شکستی سیاسەتەکانی لە ڕۆژهەڵاتی ناوەڕاست، دەسەڵاتی سی ساڵەی حزبە بۆرژوا ناسیۆنالیستە کوردەکانی دووچاری دەورەیەکی تازە لە بنبەست و بێئاسۆیی کردوە. ئەوەی لە ماوەی سی ساڵی ڕابردودا ناویان نابوو پشتیوانی ئەمریکا لە “کورد”، تەنها بەکارهێنانی ئەم حزبانە و دەسەڵاتەکەیان بوو لەلایەن ئەمریکاوە وەکو کارتی گوشار بۆ بردنەپێشی سیاسەتەکانی خۆی. ئەم حزبانە لە ڕێگای خۆگرێدانەوە بە سیاسەتەکانی ئەمریکاوە بە دەسەڵات گەیشتن و لە دەسەڵاتدا مانەوە، ئێستاش بە ناکامی و پاشەکشەی ئەمریکا، هەم دوچاری بێ ئاسۆیین و هەم دەکەونە بەر گوشاری هەمەلایەنەی دەسەڵاتی بەغدا و دەوڵەتانی ناوچەکە.
– بەدەر لەم ئاڵوگۆڕە تازانە، ئەم دەسەڵاتە گەندەڵ و چەوسێنەرە کە بە زەبری هێزی میلیشیایی داسەپێنراوە و بەسیناریۆی هەڵبژاردن ڕوپۆش کراوە، دوچاری قەیرانێکی هەمەلایەنەیە. بێتوانایی خۆی لە بەڕێوەبردنی کۆمەڵگە نیشانداوە. نەک تەنیا وەڵامی بۆ هیچ یەک لە کێشەکانی ئێستای ئەم کۆمەڵگەیە نییە، بەڵکو خۆی هۆکار و سەرچاوەی جۆرەها گرفت و کێشەیە. بێکاری و گرانی، نەبوونی خزمەتگوزارییە سەرەتاییەکان، تاڵانکردنی مووچە و هاوکات سەرکوتی ئازادییە سیاسیەکان، لە سایەی ئەم دەسەڵاتەدا جەماوەری فراوانی خەڵکی لە ناو بێدەرەتانیدا نوقم بووە. دەسەڵات لەجیاتی وەڵامدانەوە بە خواست و دابینکردنی ماف و خزمەتگوزارییە سەرەتاییەکان، لەلایەکەوە بە ناوی فرۆشتن بە کەرتی تایبەت، کەرتە خزمەتگوزارییەکان هەڕاج دەکات و دەیدات بە کۆمپانیا و بەرپرسانی خۆیان و هێندەی تر قورسایی ژیان و گوزەران دەخاتە سەر شانی چینی کرێکار و جەماوەری خەڵک، لەلایەکی تریشەوە بە سەپاندنی باج و سەرانەی هەمەجۆر چەوسانەوەی کرێکاران و جەماوەری زەحمەتکێش چەند بەرابەر دەکاتەوە.
– ئەم دەسەڵاتە کە لە بنەڕەتەوە لەسەر بناغەی ستەمکاری و تاڵانگەری و داتەکاندنی گیرفانی چینی کرێکار و جەماوەری فراوانی خەڵک و کەڵەکەی سەرمایە و قەڵای سەروەت بۆ چینی بۆرژوازی دامەزراوە، هیچ چاکسازییەک هەڵناگرێت. ستەمگەری و چەوساندنەوەی بێسنور خەسڵەتی ئەم دەسەڵاتەیە. بەڵام جگە لەم ڕاستیەش ئەزمونی چەندین ساڵی ڕابردو چەندینجار بە کردەوە ئەم ڕاستیەی سەلماندوە. ئەو هێزانەی بە بانگەشەی چاکسازیەوە هاتنە مەیدان و توانییان بۆدەورەیەك خۆشباوەری لەناو خەڵکدا دروست بکەن، لەم ڕێگایەوە خۆیان سواری شەپۆلی ناڕەزایەتی خەڵک کرد تا سوچێکی دەسەڵاتیان پێ ببڕێت. لەئاکامدا زەبرێكیان لە بزوتنەوەی ناڕەزایەتی و لە خەبات و قوربانییەکانی خەڵکی ناڕازی دا و کردیان بە دەستمایەی سات و سەودا و شەریکبوونەوە لە دەسەڵات.
– هێشتا بەشێک لە بۆرژوازی ناڕازی لە هەوڵی ئەوەدایە کە ئاسۆی بزوتنەوەی ناڕەزایەتی جەماوەری بە ئاڵوگۆڕی ڕوکەش و گۆڕینی دەموچاوەکان لەگەڵ هێشتنەوەی پایەکانی سیستەمی ئێستا تەنگ بکاتەوە. لە کاتێکدا بەدیهاتنی خواست و ئامانجەکانی چینی کرێکار و جەماوەری زەحمەتکێش و مامۆستا و فەرمانبەر و لاوان و ژنان لە هەنگاوی یەکەمدا لە گرەوی کۆتایهێنان و ڕاماڵینی گشت دەسەڵات و سەرتاپای ئەو سیستەمە بۆرژوازیەدایە کە ئێستا ئەم کۆمەڵگەیەی نوقمی نەهامەتی کردوە.
– بزوتنەوەی ناڕەزایەتی جەماوەری کە خاوەن ئەزمونێكی چەندین ساڵە و خاراوە، ئیتر باڵە ناڕازییەکانی بۆرژوازی بەئاسانی ناتوانن یاری پێ بکەن و بەرەوهەڵدێری بەرن. ئەزمونی ١٧ی شوبات و خرۆشانە جەماوەرییەکانی ئەم چەند ساڵەی دوایی، پشتی ئەم بزوتنەوەیەی بەهێز و مەحکەم کردوە. ئێستا بزوتنەوەیەکی جەماوەری تاڕادەیەک سەراسەری و ڕادیکال بە خواستی کۆتایهێنان بەم دەسەڵاتەوە پێی لە مەیدان چەقاندووە. سەرباری سەرکوتگەری و پیلانگێری دەسەڵات، ئەم بزوتنەوەیە و نەفرەت و ناڕەزایەتی جەماوەری تا دێت پەرە دەگرێت و قوڵتر دەبێتەوەو بە ئاراستەیەکدا دەڕواتە پێش، کە لە سایەی ئاسۆ و ڕابەرایەتی و بەدیلێكی شۆڕشگیڕانەدا، دەتوانێ هەوێنی ئاڵوگۆڕی بنەڕەتی و کۆتایهێنان بێت بەم دەسەڵاتە.
– لەدوای ڕوداوەکانی ١٦ی ئۆکتۆبەری ساڵی ٢٠١٧ەوە، هەلومەرجی سیاسی و ئابوری و ڕەوشی یاسایی کوردستان، ڕاستەوخۆ و جارێکی دیکە گرێی خواردەوە بە هەلومەرجی سیاسی و ئابوری عێراقەوە. بەم پێیەش هەم هەلومەرجی سیاسی عێراق و هەم بزوتنەوەی ناڕەزایەتی جەماوەری لە عێراق، وەکو فاکتەرێکی گرنگی دۆخی ئێستا، کاریگەریی هەیە لەسەر دۆخی کوردستان. ڕاپه‌ڕینی ئۆکتۆبەری شاره‌کانی عێراق، ته‌واوی هاوکێشەی سیاسی و پێگەی هێزە سیاسیەکان و هاوسەنگی نێوانیانی گۆڕی. ڕێکەوتننامەکانی پێشوی نێوانیانی هه‌ڵوه‌شانه‌وه. هه‌موو ئه‌مانه‌ش کاریگەری داناوە لەسەر بارودۆخی سیاسی کوردستان بەگشتی و پەیوەندی نێوان حکومەتی هەرێم و حکومەتی بەغدا بەتایبەتی. ئەم بزوتنەوەیە و ئاکامەکانی کاریگەری ڕاستەوخۆی هەیە لەسەر بزوتنەوەی جەماوەری دژی دەسەڵاتی بۆرژوازی کورد.
کۆنگرەی پێنجەمی حزبی کۆمۆنیستی کرێکاریی کوردستان بە لەبەرچاوگرتنی ئەم هەلومەرجە سیاسییە و بەمەبەستی کۆمەكکردن بە سەرکەوتنی بزوتنەوەی ناڕەزایەتی جەماوەری کوردستان دژ بە دەسەڵاتی میلیشایی بۆرژوازی کورد، پێداگری لەسەر ئەنجامدانی ئەم ئەرکانە دەکات؛
١/ هەوڵدان بۆ دابینکردنی ڕابەری و هەژمونی ئاسۆیەکی سیاسی شۆڕشگێڕانە و سۆشیالیستی بۆ بزوتنەوەی ناڕەزایەتی جەماوەری لە پێناو کۆتایهێنان بە دەسەڵاتی میلیشیایی و دامەزراندنی دەسەڵاتێکی پشت بەستو بە ئیرادەی ڕاسەوخۆی خەڵک.
٢/ سەرکەوتنی هەر ناڕەزایەتییەکی دیاریکراو لە دەوری داخوازی کاتی و دیاریکراو و سەپاندنی بەسەر دەسەڵاتدا، هەنگاوێکی گرنگە لە ڕێڕەوی پەرەسەندن و پێشڕەوی گشت بزوتنەوەکە لە پێناو ئامانجی کۆتایی. بەم پێیەش دەستەبەرکردنی تاکتیک و دروشم و شێوازی کارساز بۆ سەرخستنی هەر ناڕەزایەتییەکی دیاریکراو، بەپێی هاوسەنگی هێزو دوورگرتنی لەو شێوازانەی دەستی سەرکوت ئاوەڵا دەکات، مەرجێکی گرنگی پەرەگرتن و بەرەوپێشەوەچوونی بزوتنەوەکەیە.
٣/ پەردەهەڵماڵین لەسەر پلان و بەرنامەی ئەو هێزە بۆرژوازییە ناڕازیانەی کە دەیانەوێ بە پڕوپاگەندەی چاکسازی و ئاسۆی تەنگی ئاڵوگۆڕی ڕوکەش ئەم بزوتنەوەی بەرەو هەڵدێر بەرن.
٤/ دامەزراندن و شکڵدان بە شێوە جۆراوجۆرەکانی ڕێکخراوەیی کرێکاران و بێکاران و فەرمانبەران و مامۆستایان و لاوان و ژنان و..، لە بابەتی کۆبونەوەی گشتی و شوراو یەکێتی و نەقابەکان….هتد. بەڕێخستنی بزوتنەوەی کاری ڕاستەوخۆی جەماوەری بۆ دەرهێنانی بەڕێوەبردنی کاروبار و ژیانی ڕۆژانەی خەڵک لە دەست حزبە دەسەڵاتدارەکان.
٥/ برەودان و بەهێزکردنی هاوپشتی نێوان بزوتنەوەی ناڕەزایەتی جەماوەری لە کوردستان و عێراق.
٦/ وەستانەوە بەرامبەر زەخت و زۆری سیاسی و ئابوری و سەربازی حکومەتی مەرکەزی دژی خەڵکی کوردستان و بە بارمتەگرتنی نان و گوزەرانی خەڵک، بە بیانوی پابەند نەبوونی حکومەتی هەرێم بە رێککەوتنەکانیان. نابێ بە هیچ پاساوێک قوتی خەڵک تێکەڵ بە کێشە و ناکۆکی نێوان هەردوو حکومەت بکریت.
٧/ دەرکەوتنی حزب وەکو ئۆپۆزیسیۆنی سەرەکی و شۆڕشگێڕ و خوازیاری گۆڕینی دەسەڵات و ڕابەر و ڕێکخەری بزوتنەوەی ناڕەزایەتی جەماوەری.
٨/ بەرینکردنەوەی نفوزی کۆمەڵایەتی حزب و دامەزراندنی ڕێکخراوە و کۆمیتە کۆمۆنیستیەکانی حزب لە شار و ناوەندەکاندا. گۆڕینی حزب بە حزبێکی جەماوەری خاوەن ڕێکخراوی پتەوی کۆمۆنیستی بەتایبەت لەناو کرێکاران و ژنان و لاواندا.
کۆنگرەی پێنجەمی حزبی کۆمۆنیستی کرێکاریی کوردستان
دیسەمبەری ٢٠٢١
