بەیاننامەی حزبی کۆمۆنیستی کرێکاریی کوردستان سەبارەت:

نابێ ڕێگابدەین بەڵای شەڕێکی تری حزبەکانی بزوتنەوەی کوردایەتی

یەخەی خەڵکی کوردستان بگرێتەوە!

هەریەک لە پارتی دیموکراتی کوردستان و پارتی کرێکارانی کوردستان (پەکەکە)، بەجیا لەوەی ماوەیەکە هێرشێکی فراوانی میدیایی لەبەرامبەر یەکتردا ڕەخساندووە، لەهەمان کاتدا هێز لە دژی یەک دەجوڵێنن و ئەگەری هەڵگیرسانی شەڕێکی ناوخۆ خەریکە یەخەی دانیشتوانی هەرێمی کوردستانی عێراق دەگرێتەوە. ئەم شەڕە بەهەر بەهانەو نەخشەو سیاسەتێک لەهەر لایەنێکیانەوە بێت، شەڕی ناڕەوای نێوان دوو هێزی میلیشیایی و کۆنەپەرستی بزوتنەوەی کوردایەتیە کە چەندین دەیەیە ژیانی کرێکاران و زەحمەتکێشانی کوردستانیان لە ناوگێژاوێکی سیاسیدا کردۆتە تراژیدیاو کارەساتێکی هەمیشەیی.

واقعیەتی بونی حزب و هێزە میلیشیاکانی بزوتنەوەی کوردایەتی بە تایبەتی لەدوای ساڵی ١٩٩١ وەک هێزی دەسەڵاتدار، چەتە ئاسا لە پێناو تاڵانی و قۆرخکردنی سەروەت و سامانی کوردستان هەمیشە خەڵکیان لە ژێر چەتری کێشمەکێش و مەترسی شەڕی نێوان خۆیاندا ژیاندووەو بۆ ساتێکیش هەلی ئارامی و ئاسودەییان نەهێشتۆتەوە، هەمیشە ئەولەویەت بۆیان خزمەتچی و نۆکەری پاراستنی بەرژەوەندیەکانی ووڵاتانی زلهێزی دنیاو ووڵاتانی ناوچەکە بووە، کێشمەکێش و شەڕەکانی نێوان خۆشیان هەر لە چوارچێوەی ئەو نۆکەرایەتیەوە بووە.

دوای نزیک بە سی ساڵ لەدەسەڵاتی بزوتنەوەی کوردایەتی لەسایەی سێبەری نەخشەو سیاسەتەکانی دەوڵەتی ئەمریکاو دەخالەت و کێشمەکێشی ووڵاتانی تری ئیمپریالی و ووڵاتانی ناوچەکە لە ڕۆژهەڵاتی ناوەڕاستدا، ئاڵوگۆڕێک لە ناوچەکەدا پێش هاتووەو پێشبینی دەکرێت کە هاوکێشەی سیاسی دەورانێکی تازەتر لە دەخالەت و دەورو نەخشە و کێشمەکێشی لایەنەکانی دەخالەتگەر لە ناوچەکەدا ئایندەو دەورانێکی تر بەخۆیەو بگرێت، کە لەم دەورە تازەیەدا بە جۆرێک خزمەتچێتی و چارەنوسی هێزەکانی بزوتنەوەی کوردایەتی خستۆتە ژێر پرسیار و ئایندەیەکی ناڕۆشن، کە هەر ئێستا لە قەیرانێکی قوڵی وەهادا قەراریان گرتوە، بەهەر قیمەتێک بێت لەهەوڵی ڕزگارکردن و پاراستن و مانەوەی هێزەکانیاندان. لەم بارەیەوە جگە لە مانۆڕی سیاسی و ڕێکەوتنی ژێربەژێر و پیلانگێڕی لە یەکترو ملشۆڕی زیاتر بۆ زلهێزەکان و تورکیا و ئێران چارەیەکی تریان نیە، بۆیە فەزای ترسی شەڕی ناوخۆ بانگەشە دەکەن و تەواو نابەرپرسیارێتی خۆیان لە بەرامبەر ژیان و گوزەران و پێداویستیە تەندروستی و خزمەتگوزاریەکاندا بە ئاشکرا ڕادەگەیەنن.

پارتی دیموکراتی کوردستان لەلایەک بۆ دەربازکردنی خۆی و کابینەی حکومەتەکەی لەقەیران و بنبەستێک کەتێیدا چەقیوەو لەلایەکی تریشەوە بۆ سەرکوتی ناڕەزایەتی جەماوەری کرێکاران و زەحمەتکێشان و بردنە دواوەی ڕق و بێزاریان لەبەرامبەر دەسەڵاتدا، هەروەها بۆ وەڵامدانەوە بەمەرامی حکومەتەکەی کازمی و دەوڵەتی تورکیا، لەپێناو وەرگرتنی ئیمتیازاتی پارەو پۆست، کە لەڕێکەوتنی ئەم دواییانەی لەسەر شەنگالدا وەک ئامانجێکی گڵاوو سەوز بووە، سیاسەتی داسەپاندنی جەنگێک بەسەر خەڵکی کوردستاندا هەڵبژاردووە، تا لەم ڕێگایەوە هەم پەکەکە ناچار بکات بەقەبوڵکردنی مەرجەکانی پارتی، هەم گرێ کوێرەی کێشەکانی لەگەڵ بەغدا بکاتەوە و لەئاکامیشدا وەک هێزێکی باڵادەست جێگاو ڕێگای خۆی جێگیرکات.

ئەم سیاسەتە شەڕخوازیەی پارتی و حزبە دەسەڵاتدارەکانی بۆرژوازی کورد، لەکاتێکدایە کەخەڵکی کوردستانیان توشی کۆمەڵێک قەیران کردوە، هەر لەنەدانی موچەو نەبونی سەرەتایی ترین خزمەتگوزاریەکان و پێداویستیەکانی ژیان وهەوڵنەدان بۆ پێشەکەشکردنی خزمەتگوزاریەکی تەندروستی گونجاو بۆ توشبوانی ڤایرۆسی کۆرۆنا، جارێکی تر لە پێناو بەرژەوندی هێزەکانیان بە شەڕێکی ناوخۆ کە هەر بۆ خۆیان حەرامیان کردووە دەیانەوێت کارەسات و بەڵای زیاتر بەسەر خەڵکی کوردستاندا بسەپێنن.

ئەوە ئاشکرایە کە ململانێ و کێشمەکێشی نێوان ئەم دوو هێزە میلیشیا کۆنەپەرستەی بزوتنەوەی کوردایەتی، نەک هیچ پەیوەندیەکی بە بەرژەوەندی ژیان و گوزەرانی خەڵکی کوردستانەوە نەبوەو نیە، بەڵكو مایەی کارەسات و نائەمنی و ترس و دڵە ڕاوکێیەو نابێ ڕێگە بەهیچ لایەکیان بدرێت ئەم شەڕە بخولقێنن و مەترسی بۆ سەر ژیانی خەڵکی دروست بکەن. پێویستە تەواوی ئەو هێزە سیاسیانەی لە کوردستاندا هەڵسوڕانی سیاسی دەکەن پابەندبن بەوەی کە نابێت بە هیچ جۆرێک کێشەی سیاسی نێوانیان بکێشنە توندوتیژی و شەڕ لەبەرامبەر یەکتردا.

حزبی کۆمۆنیستی کرێکاریی کوردستان لەگەڵ ئەوەدا کەجەخت دەکاتەوە کە بەبێ کۆتاییهێنان بە دەسەڵاتی ئەم حزبە میلیشیا ناسیۆنالستانە خەڵکی کوردستان نەک هیچ ئاشتی وئارامی و خۆشگوزەرانی بەخۆیەوە نابینێت، بەڵکو هەمیشە لە ناو گێژاوی سیاسی و نائەمنی و شەڕو کارەسات و ئاوارەیدا ژیان بەسەر دەبەن. هاوکات بانگه‌وازی هه‌موو دەستەو کەسایەتی و هەڵسوڕاوانی چەپ و ئازادیخوازو هه‌ر لایه‌نێك دەکات، که‌خۆی به‌به‌رپرس دەزانێ بەرامبەر بە ژیان و گوزەرانی خەڵکی کوردستان، بێنەمەیدان وچیتر ڕێگا نەدەن ئەم حزبانە یاری بە ژیان وگوزەران و چارەنوسی خەڵکی کوردستانەوە بکەن.

حزبی کۆمۆنیستی کرێکاریی کوردستان جارێکیتر ئەو ڕاستیە دوپات دەکاتەوە کە هاتنەمەیدانی جەماوەری ناڕازی و رێکخراو بە ئاسۆی وەلانانی دەسەڵاتی ئەحزابی بۆرژوا ناسیۆنالیستی کورد و دابینکردنی دەسەڵاتدارێتی جەماوەری پێداویستیەکی دەست بەجێ و هەر ئێستایە، بەئاڕاستەی هێنانەکایەی کۆمەڵگایەکی ئارام و یەکسان و خۆشگوزەران.

حزبی کۆمۆنیستی کرێکاریی کوردستان

٥/١١/٢٠٢٠