hkkurdistan
بۆرژوازی لەڕیاکاریدا…
کوا ٤٠٠ میلیارەکە کوا سەرجەم سەروەتی کۆمەڵایەتی؟….
نووسینی: ئیبراهیم حسێن…
چارەنوسی ئەو٤٠٠ مییلیاردەی کە حاکمانی بۆژوای عێراق دایانە دەستی حاکمانی بۆرژوا لەهەرێم کە لە نێو درۆ و دەلەسەی بۆرژوازی لەکوردستان لولکراو ئێستا کرێکاران و خەڵکی برسی و زەحمەتکێش دەستیان چۆتە دەمیان و سەرسوڕماو دەپرسن پارەیەک کە قەراربوو، ئەگەر بۆ مانگێکیش بێ لەدانی کرێ و موچە و دابینکردنی پێداویستیەکانی بژێوی ژیانی خەڵکێکی برسی هیچ لەسەر سفرەکانیان نییە خەرج بکرێ، بۆ کوێ چوو؟
هەڵبەتە جەنابانی سەرمایەدار لەکوردستان و نوێنەرانی وردودرشتیان، یەک لەدوای یەک کەوتونەتە تەڵقینی چینی کرێکارو برسییەکان و کۆمەڵگەو بۆ شەرعەنەکردن و پاککردنەوەی ئەوگوناهە بە حەقی کۆمەڵگە بازاڕیکی گەرمی درۆ و دەلەسەیان بەڕێخستووە کە ئەوسەری دیار نییە.
لە مەلابەشیر حەدادەوە کە ماوەیەکە مینبەری فەتوای کوشتنی بە جێهێشتووەو لە ڕیزی چینەکەی خۆیدا، چینی بۆرژوای کوردستان و لەسیاسەتی چینەکەی خۆیدا بە پلەوپایەی پەرلەمانتاری ئیماندار گەیشتووە، فەتوای داوە کە شەرعەن جایزە ئەو پارەیە لە دانەوەی قەرزە خەیاڵییەکانی سەرمایەکانیان خەرج بکرێ، تا دەگا بەنوێنەرە گەنجترەکانیان لە خانەوەدەکانی تاڵەبانی و بارزانی کە وتویانە هەر خۆی پارەکە ئەوەندە نییەو دوایی وتیان مەسەلەکە لای وەزارەتی داراییە و ئەوان دەبێ ڕوونکردنەوە بدەن، تا بەڵکو کۆمەڵگەیەک کە ڕۆژانە بە هەزاران زمان، گاڵتە بەبێ لیاقەتی و ناپێویستی وبێ کەڵکی خودی ئەو کەمایەتییە سەرمایەدارەو دەسەڵاتەکەی دەکەن، ئەگەر بۆ خۆ خەڵەتاندنیش بێ ڕوونکرنەوەیەک لە بورژوازی وەربگرن.
چارەنوسی ئەو٤٠٠ میلیارە کە تەنیا گۆشەیەکی بچوک و کەسرێکی زۆر کەمی تەواوی سەروەتی کۆمەڵایەتی پێکدەهێنێ کە لە فۆرمی سەرمایەدا، بۆرژوازی دەستی بەسەرداگرتوە، ڕاستی تاڵ و دراماتیکی ژیان لەسایەی سەرمایە و دەسەڵاتی بۆرژوازی دەسەلمێنێ.
ڕاستییەکی تاڵ کە هەم مایەی گاڵتەو هەم مایەی ئازارو نەفرەتە. چونکە شێوەی ژیانێک کەسەرمایە و بۆرژوازی سەپاندویەتی بەسەر کرێکاران و برسییەکان و کۆمەڵگەدا، هەر دوو ڕووی هەیە، هەم تراژیدیک و هەم کۆمیک، بە کورتیەکەی کۆمیدیا- تراژیدیای ژیان لەم سێگۆشەی میناتۆریەی جیهان، کە کراوە بە بەهەشتی باج و بەهەشتی کاری هەرزان و بێ حیساب کیتابی سەرمایەو، ناوی کوردستانەو حاکمانیشی ئەم کەمایەتیە بۆرژوا و سەرمایەدارەیە کە بوون و دەسەڵاتی بەتەواوی ناکۆکە نەک هەر تەنیا بە سەعادەت و خۆشبەختی و ئازادی واقعی، بەڵکو تەنانەت ناکۆکە بە لانیکەمی هەرە سادەکانی ژیان.
داوای ڕوونکردنەوە لەبارەی چارنووسی ئەو کەسرەی سەروەتی کۆمەڵایەتی هەروەک چاوەڕوان دەکرا بە لاقەیدی و چاو و ڕوقایمیەکی بێشەرمانە و بە ڕیاکاریەکی بێ ئەوپەڕ، لەلایەن بۆرژوازیەوە وەڵامی وەرگرتەوە و ئیتر دەورانی پێویستی کۆتاییپێهێنانی ئەم تراژیدیا-کۆمیدیایەی ژیان لە سایەی دەسەڵاتی ئەو کەمایەتییە سەرمایەدارەیە وەک پێویستیەکی لەچار نەهاتوی ئاڵوگۆڕی بنەڕەتی دەبێ دەست پێبکا، چونکە ئیتر دەسەڵاتی سیاسی سەرمایەو بورژوازی لە کوردستان هەم بۆخۆی ڕۆچۆتە ناو بنبەست و قەیرانێکی سەرتاپاگیرەوە و هەم سەرجەم ژیانی کۆمەڵایەتی لە سادەترین شێوە مومکینەکانی خۆیدا، لە تەندروستی و سەلامەتییەوە بیگرە تادەگا بە خوێندن و پەروەردە، لە ئاو و کارەباوە بیگرە تا دەگا بەخودی نان و زادی مانەوەی ئاسایی، ڕووبەڕوی بێدەرەتانیەکی گەورە کردۆتەوە.
کرێکاران وبرسییەکانی کۆمەڵگە حەقیانە نەیانەوێ تەنانەت بۆ یەک ڕۆژیش ئەو ژیانە بژین، حەقیانە کە بۆ یەک ڕۆژیش بێکارەبایی و بێئاوی و بێ مەسکەنی و بێ داو و دەرمانی وبێدەرەتانی قبوڵ نەکەن و حەقیانەکە لە هیچ کەسرێکی سەروەت و سامانی کۆمەڵگە خۆش نەبن و ئەو کەمایەتییە بۆرژواو سەرمایەدارە لە دادگای ڕاپەڕین و سەرەنجام و لەدوا لێکدانەوە لەشۆڕشێکی گەورەی کرێکاران و برسییەکاندا، بێهێنە پای ئەوەی کە هەر قروشێکی سەروەتی کۆمەڵایەتی کە لەشیۆەی سەرمایەدا لە خاوەندارێتی ئەواندا بووە، چارەنووسەکەی ڕوون بکەنەوەو بۆکۆمەڵگەی بگێڕنەوە.
دەعوا لەسەر ٤٠٠ میلیار، لەسەر ئەو کەسرە کەمەی سەروەت، بەشێکە لەدەعوایەکی گەورەتری چینایەتی لەسەر کۆمەڵگە، لەسەر موڵکایەتی و داماڵینی موڵکایەتی لەو کەمایەتیە سەرمایەدارەی کە بە داماڵینی زۆرینە لە هەموو خاوەندارێتیەک، لە هەموو ئیمکاناتێکی ماددی، ئەوانیان گۆڕیوە بە کۆیلەی کرێگرتە، بە کەسانێک کە جگە لە هێزی کاریان هیچ دەرەتانێکی تریان بۆ زیندومانەوە نییە.
بەکورتی بەشێکە لەدەعوای چینایەتی و لەپەرچەمی چینایەتی کرێکاران بۆ دەستبردن بۆ ڕیشەی چەوسانەوە. سەرەنجام دەعوایە لەسەر داماڵینی دەسەڵات لە کەمایەتییەکی سەرمایەدار کە لەباری مێژوویی و کۆمەڵایەتیەوە، بوون و دەسەڵاتەکەی لەهەر شێوەیەکدا، ڕێگڕو کۆسپی سەر ڕێگای سەعادەت و ئازادی واقیعیە.
ئەمە ئیتر تەنها ئارەزویەکی شیرین و لەدڵەوەی ئێمە کۆمۆنیستە کرێکاریەکان و کرێکارانی کۆمۆنیست و حزبی کۆمۆنیستی کرێکاریی نییە، بەڵکو پێویستیەکی بنەڕەتی و لەچارنەهاتوی دەستبەجێیە بۆ ئاڵۆگۆڕ بە قازانجی ئاڵوگۆڕ، بەقازانجی کرانەوەی دەرفەت و دەرەتانی ڕزگاری لەو بێدەرەتانییە سەرتاپاگیرەی ئێستا.
ڕۆژانی داهاتوو لە مێژووی کوردستان، ڕۆژانێکی سەخت و تەنانەت دەتوانێ مێژووکردبێت، چونکە دەواری دەسەڵاتی سەرمایە و بۆرژوازی لەهەر کات شەق و شڕتڕو بەناچاری و بە پلەی یەکەم بەهۆی خودی واقیعیەتی ناکۆکی سەرمایە و بەریەککەوتنی ڕاستەوخۆی دەسەڵاتی سەرمایە و بورژوازی لەگەڵ پێداویستیه سادەکانی ژیانێکی تەنانەت سادەش، دەکەوێتە بەردەم لافاوی خواستێکی فراوانی کۆمەڵایەتی بۆ ئاڵوکۆڕ کە لە هەر گۆشەیەکەوە، لە کوردستان دەیەوێ ڕێگای خۆی بکاتەوەو یەکەم هەنگاو لەو ڕێگایەدا داماڵینی شەرعیەتە لەو کەمایەتییە سەرمایەدارەو داماڵیینیەتی لە قورەت.
٢٠/٦/٢٠٢٠
