hkkurdistan
عبداللە مەحمود
لەوە ئەچێت بۆمباربارانکردنی خەڵکی کوردستان، قەدەرێکی مارەبراوی ئەبەدی جیانەبووەوە بێت لەهاوڵاتیانی کوردستان. هەرجارەش بە شێوەیەک و بەجۆرێکی تایبەت بەڕێوەبچێت. خەڵکی کوردستان کەم بەدەستی ڕژیمە یەک لەدوای یەکەکانی عێراق و وڵاتانی کۆنەپەرستی ناوچەکەوە، بەتایبەتیش ڕژیمی بەعس بۆمباباران نەکراوە، ئاماری کوشتاری خەڵک بە بۆمباران و لەوانەش واوەتر بە چەکی قەدەغەکراوی نێودەوڵەتی وەکو بۆمبی هێشوویی، ناپاڵم، کیمیایی ….تاد. بەهەزارانن.
لەو کاتەشەوە دەسەڵاتی بەعس وەلانراوە، کوردستان دەستی پیسی ئەوانی بەسەرەوە نەماوە، دەسەڵات سپێردراوەتە ئەحزابی قەومی کورد، جگە لە قوربانیانی شەڕی ناوخۆ، جگە لەقوربانیانی تیرۆریزمی ئیسلامی، جگە لەقوربانیانی ناموسپەرستی و پیاوسالاری، قوربانیانی بۆمبارانکردن و ژەهراویکردنی کوردستان و خەڵکەکەی بە خۆراک و دەرمانی بەسەرچوو و کۆن، قەدەرێکی ترە. و دەستی ناوەتە بینەقاقای خەڵکی کوردستان.
بەپێی قسەی بەرپرسی لیژنەی چاودێری کوالیتی خۆراک، و ئەو بەرنامانەی جارجار لایەک لە خۆراک و دەرمان دەدەنەوە، زوربەی زۆری خواردن و خواردنەوەو دەرمان و پێداویستیەکانی بەڕێوەچوونی ژیانی خەڵکی ژەهراوین، کۆن و بەسەرچوون، لە ئاکامی خواردنی ئەم خۆراکە پیس و بەسەرچوو ژەهراویانەدا، نەخۆشی قورس، لەوانە شیرپەنجە و جەڵتەی دڵ و دەماخ بە ڕادەیەکی سەرسوڕهێنەر لەکوردستان زیادی کردووە.
هێنانی ئەم موادە بەسەرچووانە و کاڵا ناچیزانە بە نرخێکی هەرزان و قازانجی خەیاڵییەوە، لەلایەن سەرمایەدارانی کوردو بەرپرسانی ئەحزابی دەسەڵات بەدەستە.
هەموو لایەک ئەو ڕاستییە دەزانن کە بازاڕی کوردستان و هەموو بوارەکانی ژیان و ژیاری لەلایەن هەردوو حزبی دەسەڵات بەدەستی کوردستان یان کەسانی نزیک بەخۆیانەوە پاوان کراون، یەکێک لە سەختیەکانی ئەم ژێر سایەی ئەم دەسەڵاتە میلیشیا حزبییە ئەوەیە کەسی دەرەوەی دەسەڵات ناتوانێت سەرمایە بخاتە گەڕو وەبەرهێنان بکات ئەگەر ئەوان لەو بازاڕەدا کە ناویان ناوە” بازاڕی ئازاد” تەئیدی نەکەن و نەبێتە شەریکە بەشی خۆیان.
هیچ لەوەش ڕۆشنتر نییە، ئەوەی کە دەتوانێت بازگەکانی ئەم وڵاتە بەسانایی ببڕێت ئەو کۆمپانیایانەن کە پەیوەندی ڕاستەوخۆیان بەدەسەڵات و سەرمایەداری سەر بەدەسەڵات و سەیارە جام ڕەشە ناونەبینراوەکانەوە هەیە، تەنانەت ئەو خۆراک و مواد ودەرمانانەش کەهەندیک جار ئەیسوتێنن و دەستی بەسەرائەگرن ومیدیای ئەم وڵاتە نیشانی خەڵکی ئەدەن، ئەوبەشەیە کە دیسان ئەم کۆمپانیایانە فرۆشتویانەتە چەند دوکاندارێک. ئەگەر نا هەرگیز ئاگر و زبڵخانەکان یەک کیلۆ مودای بەسەرچووی کۆمپانیا زەبەلاحەکانی بەرپرسان و سەرمایەدارانی سەر بە حزبیان نەبینیووە.
ئێستا خۆراک و دەرمانی کۆن و ماوە بەسەرچوو لەپاڵ دەسەڵاتی تاڵانچی و مافیایی و ئۆپۆزیسێۆنێکی بودەڵەی قیرقیرکەردا، لەپاڵ میتی تورکی و بەرەی تورکمانیدا، لەکەنار دەستێوەردانی بەردەوامی ئاخوندەکانی ئێراندا، لەڕێگای قازانج پەرستان وسەرمایەدارانی کوردەوە بەسەر خەڵکی کوردستاندا دابەشدەکرین. ئەو خۆراک و دەرمانە کۆن و ماوە بەسەرچوانە کە بازاری کوردستان بۆتە باشترین بازار بۆساغکردنەوەیان، هاوکات بۆتە قەتلگایەکی هەمیشەیی شێنیەیی بۆ خەڵکی کوردستان، ئاماری نەخۆشیەکان و خەستەخانەکان گەواهی ئەو ڕاستیەن، کە ڕۆژ بەڕۆژ ڕادەی مردن بە نەخۆشی دڵ و شێرپەنجە زیاد دەکات.
ئەم کوشتارە هیچ جیاوازیەکی لەکوشتاری بۆمبابارانەکانی تری کوردستان کەمتر نییە کە بەعس ئەنجامدەری بوو، جیاوازی لەگەڵ کوشتاری دیل و قوربانیانی جەنگی ناوخۆ نییە، ئەگەر جیاوازیەک هەبێت ئەوەیە کە کوشتاری ئەمجارە بە چەکی گەرم و چەوری بەعس و وڵاتانی ناوچەکە نییە، بەناپاڵم و بۆمبی هێشوویی و غازی خەردەل و سیانید نییە، کوشتارگاکەی کەپکی حەمەدئاغاو کوێ و کوێ نییە، کاریگەریەکەی لەچەند چرکەیەکدا نییە. بەڵکە ئەمجارە بەچەکی ساردو ئەو موادە کیمیایانەیە، کە لە ئاکامی کۆن بوون و ماوەبەسەرچوونی خۆراکدا پێکهاتوون، مەرگەکەی شێنیەیی و لەسەرخۆیە، ئەنجامدەرانی سەرمایەدارانی سەر بەئەحزابی دەسەڵات بەدەستی کوردستانن.
ئەگەر ویژدانی مرۆڤایەتی بەرامبەر بەکارەسات و تراژیدیاکانی سەرخەڵکی کوردستان لەوانە بومباباران و کیمیابارن و ئەنفال، بێدار نەبۆوەو ڕێگە گیرا لەوەی دنیای شارستانی و ئینسانی لە قوڵی و دڕندەیی ئەم کارەساتانە بگەن، ئەوا ئەمجارە نابێت ڕێگە بدرێت ئەم تاوانکاریەو ئەو کوشتارە شێنیەیی و لەسەرخۆیەی خەڵکی کوردستان درێژەی هەبێت.
ئەگەر دزی و تاڵانی دیاردەیەک و سیمایەکی بەرجەستەی ئەحزابی قەومی کوردە، ئەوا ئاکام و تەنها ئاکامێکی ئەم گەندەڵی تاڵانییە ئاشکرایەیە، ئەو بۆمبارانەیە کەبەموادی ئێکسپایەر وچەکی سارد لەدژی خەڵکی کوردستان ئەکرێت.
پێوستە هەرچی زووە خەڵکی کوردستان لەدژی ئەم کوشتارە بێنەمەیدان و دەنگ هەڵبڕن…
تیبینی: ئەم بابەتە لە بۆپێشەوەی ژمارە ٣٤ بەرواری ١٥/٨/٢٠١٨ دا بڵاوکراوەتەوە
