hkkurdistan
حزبی کۆمۆنیستی کرێکاریی کوردستان
دوای دەیان ساڵ لە سەرکوت و کۆمەڵکوژی و وێرانکاری کە لەلایەن دەوڵەتە شۆڤێنستە یەک لە دوای یەکەکانی عێراقەوە لە دژیان پیادەکراوە، سەرئەنجام خەڵکی کوردستان، رۆژی ٢٥ سەپتەمبەر لە ژێر گوشار و هەڕەشەیەکی گەورە و فراوانی ناوخۆیی و ناوچەیی و جیهانیدا، ڕیفراندۆمیان ئەنجامداو بەدەنگی زۆرینە وتیان بەڵێ بۆ جیابونەوەو سەربەخۆیی کوردستان.
بەدوای ئەم بڕیارەی خەڵکی کوردستاندا، دەسەڵاتدارانی شۆڤێنیست و تائفی لەبەغداو دەوڵەتانی سەرکوتگەرو کۆنەپەرستی ناوچەکەو جیهان لە پێناو بەرژەوەندی و نەخشەکانیان لە ناوچەکەدا، خەریکن بە ناوی ” پاراستنی یەکپارچەیی خاکی عێراق”ەوە هەڕەشە لەخواست و دەنگی سەربەخۆی خەڵکی کوردستان دەکەن؛ هەر لە هەڕەشەی سنورداخستن و رێگرتنی هاتوچۆ و گەمارۆی ئابوریەوە تائاستی مانۆری سەربازی. لەهەمویان ریسواتر هەڵوێستی ئەنجومەنی ئاسایشی نەتەوە یەکگرتوەکانە کە رێگا دەکاتەوە بۆ عەبادی و مالکی و پەرلەمانی بەغدا و دەوڵەتی ئەردۆگان و مەلاکانی ئێران، پەنجەی سزادانیان لە خەڵکی کوردستان رابوەشێنن و فەزای ترس و دڵەراوکێ بڵاوبکەنەوە، بۆئەوەی پاشەکشە بە هەنگاوەکانی دوای ریفراندۆم بکەن. ئەم هەڵوێستانەی ئەنجومەنی ئاسایش و دەوڵەتانی کۆنەپەرستی ناوچەکەو ئەمریکاو هاوپەیمانەکانی تەواوی بانگەشەکانی حزبەکانی کوردایەتی بە درۆ دەخاتەوە کە ئەو دەوڵەت و دامەزراوە ئەمپریالیستانەی وەکو دۆستەکانی خەڵکی کوردسان و مافی مرۆڤ و ئاسایشی جیهانی دەناساند. مێژوی ئەو رێکخراوو دەوڵەتانە پڕە لە شەرعیەتدان و بەڕێخستنی سیاسەتی داگیرکاری و شەری دڕندانەو وێرانکاری و کوشتاری بەکۆمەڵی مرۆڤ لە تەواوی جیهاندا.
ئەمڕۆ جەماوەری خەڵکی کوردستان تەنیا لەبەرئەوەی سەرەتاییترین مافی خۆیان پیادە بکەن، خراونەتە ژێر باری گوشار و هەڕەشەی برسیکردن و تەنانەت پەلاماری سەربازیش! حکومەت و پەرلەمانی ناسیۆنال- فاشیست و تایفەگەری بەغدا، رژێمی مەلا چنگ خوێناویەکانی ئێران، دەوڵەتی فاشیستی ئەردۆگان، دەستیان کردوە بە جۆرەها مانۆڕی سەربازی و کەڵبەی خوێناوی سوپا و میلیشیاکانیان نیشانی خەڵکی کوردستان دەدەن، بۆئەوەی ناچاریان بکەن لە بڕیاری ریفراندۆم پەشیمان ببنەوەو مل بدەن بەو بڕیارانەی بە زۆر بەسەریاندا دەسەپێنرێت.
خەڵکی کوردستان ٣ ساڵە بەرامبەر بەربەریەتی داعش راوەستاون. ٣ ساڵە ئەم خەڵکە بەشێوازی جۆرواجۆر بەرگری لە خۆیان و لە مەدەنیەت دەکەن. بەرامبەر بەدڕندەیەك دەجەنگن کە دەستکردی ئەمریکا و دەوڵەتانی ئەمپریالسیت و رژێمە گوێ لەمستە ناوچەییەکانیانە. کەچی ئەمڕۆ لەگەڵ دەستبردن بۆ سەرەتاییترین مافی خۆیان کە بریتیە لە ریفراندۆم بۆ هەڵبژاردنی ئایندەی دڵخوازی خۆیان، دەکەونە بەرامبەر گەلەکۆمەیەکی گەورەی جیهانی و ناوچەیی. ئەگەر ئەم لۆژیکە رێگای پێبدرێت، ئیتر سەراسەری جیهان دەبێتە کۆیلە و دیلی دەستی ئەم دەوڵەتە سەرکوتگەر و ئەمپریالیستیانە.
خەڵکی ئازادیخوازی جیهان!
رێکخراوە کرێکاری و سۆشیالیستی و مرۆڤ دۆستەکانی جیهان!
خەڵکی کوردستان تەنها بەهۆی پیادەکردنی مافێکی سەرەتایی خۆیەوە، کەوتوەتە بەردەم هەڕەشەیەکی گەورە و هەمەلایەن! گەلەکۆمەیەکی گەورەی ناوچەیی و جیهانی دەیەوێ ئیرادەی ئەم خەڵکە ستەمدیدەیە بشکێنێ و ملکەچی بکاتەوە بەو ئەسارەتەی دەیان ساڵە لە دژی بەڕێوەدەبرێت. خەڵکی کوردستان پێویستی بە هاوپشتی و بەدەنگەوەهاتنی ئێوە هەیە. دەنگی ناڕەزایەتیتان بەرز بکەنەوە، گوشار بخەنە سەر دەوڵەتانی زلهێز و نەتەوە یەکگرتوەکان بۆ دەستهەڵگرتن لەم گوشارانە ولە دەست ئاوەڵاکردنی دەوڵەتانی فاشیستی ئیسلامی و قەومی ناوچەکە کە هەڕەشە لە خەڵکی کوردستان بکەن. ئێوە بوون فریای خەڵکی کۆبانی کەوتن و سەرکەوتنێکتان بۆ مرۆڤایەتیی ئازادیخواز تۆمارکرد. ئەمڕۆش کاتی ئەوەیە بۆبەرگری لە مرۆڤایەتی و ئازادی، دەنگتان بەرزکەنەوە. پشتیوانی لە خواستی خەڵکی کوردستان بکەن بۆ دامەزراندنی دەوڵەتی سەربەخۆ.
کرێکاران، خەڵکی ئازادیخوازی عێراق!
ئەوەی خەڵکی کوردستان لە ریفراندۆمی ٢٥ی سەپتەمبەردا بڕیاریان لەسەر داوە، تەنها راگەیاندنی ئەوەیە کە دوای دەیان ساڵ لە ستەم و شەڕ و کوشتارێک کە هەموو جەماوەری خەڵکی عێراق قوربانیەکەی بوون، دەیانەوێ جیاببنەوە و لەگەڵ خەڵکی عێراقدا وەکو دوو دراوسێ و دۆست و پشتوپەنا و هاوکاری یەکتربن. بەڵام دەسەڵاتدارانی عێراق دەیانەوێ خۆڵ بکەنە چاوی خەڵکی عێراقەوە. دەیانەوێ شەڕی نەتەوەیی و تائیفی و کۆمەڵکوژی بەرپا بکەن. ئەمانە دەیانەوێ میراتە فاشیستیەکانی رژێمی ئەنفالچی و کیمیابارانی بەعس زیندووبکەنەوە. ئێمە بانگەوازتان دەکەین نەک هەر فریوی ئەم هاتوهاوارە فاشیانەیە مەخۆن، بەڵکو بەهەموو تواناوە بەرامبەری راوەستن و هاوپشتی و هاوچارەنوسی خۆتان لەگەڵ خەڵکی کوردستان نیشان بدەن. دەستی ئەم سەرکوتگەرانە ببەستن لەوەی خەڵکی کوردستان بخەنە ژێرگوشارو هەڕەشەوە. خەڵکی کوردستان نەک هیچ کێشە و ناکۆکیەکی لەگەڵ خەڵکی کرێکار و ئازادیخوازی عەرەبزمان نییە، بەڵکو ئەوان بە هاوچارەنوسی خۆیان دادەنێن. ئەوە دەوڵەتانی فاشیستی عێراق و شەڕو رکەبەری نەتەوەیی ناسیۆنالیزمی کورد و عەرەبە کە پێکەوە ژیانی ئەم خەڵکەیان دژوار کردوە. دوای دەیان ساڵ ستەم، خەڵکی کوردستان دەبێت ئازادبن لەوەی چۆن ئایندەی خۆیان دیاری دەکەن. خەڵکی ئازادیخوازی عێراقیش پێویستە پشتیوانی لەم مافە سەرەتاییەی خەڵکی کوردستان بکەن.
کرێکاران، جەماوەری ئازادیخوازی تورکیا و ئێران!
ئەحزابی سیاسی و رێکخراوەکانی لایەنگر لە ئازادی و مرۆڤایەتی لە ئێران و تورکیا!
دوو دەوڵەتی سەرکوتگەر و مرۆڤکوژی ئەردۆگان و مەلاکانی ئێران زۆر دڕندانە خەڵکی کوردستانی عێراقیان خستوەتە بەردەم هەڕەشەی هەمەلایەنە، تەنها لەبەرئەوەی ئەو خەڵکە دوای دەیان ساڵ ستەم و کوشتاری بەکۆمەڵ لە ریفراندۆمێکدا بڕیانداوە ئیتر لەگەڵ عێراق نەمێننەوەو دەوڵەتێکی سەربەخۆ دروست بکەن. ئەم دوو دەوڵەتە کۆنەپەرستە جگە لە هەڕەشە و گوڕەشەکانیان، هانی دەمارگیری نەتەوەپەرستی تورکی و فارسی دەدەن بۆ تێکدانی فەزای نێوان خەڵکی ناوچەکە. خەڵکی کوردستان هیچ کێشەو گرفتێکی لەگەڵ هیچ خەڵکێکی دیکە نیە. خۆی بە هاوپشت و هاوچارەنوسی هەموو جەماوەری کرێکارو ئازادیخوازی ناوچەکە و جیهان دەزانێت. ئێمە بانگەوازتان دەکەین دژی سیاسەتە دژی ئینسانیەکانی ئەم دوو دەوڵەتە فاشیستە راوەستن و هاوپشتی خۆتان لەگەڵ خەڵکی ستەمدیدەی کوردستان نیشان بدەن.
٢٨/٠٩/٢٠١٧
