hkkurdistan
عوسمان محەمەد:
لە بەرنامەیەکی تەلەفزیۆنی nrt دا کە لە بەرواری ٤ی ئازاری رابردوو پەخشکرا، ژمارەیەکی زۆر لە ژنان و پیاوانی لەشەقامەکانی شاری سلێمانیدا دواند، دەربارەی رای خەڵک سەبارەت بە هەڵبژاردنی رابردوو کە چۆن پێشوازیان لە سندوقەکانی دەنگدان کردووە، هەروەها دەربارەی ئەوەی کە چۆن پێشوازی لە هەڵبژاردنی ئایندە دەکەن؟ ئایا دیسان وەکو جارەکانی پێشوو خەڵک بە پیری بانگیشەی هەڵبژاردن و دەنگدانەوە دەچن یان هەڵوێستێکی جیاوازیان دەبێت لە بەرامبەریدا؟ ئایا هێشتا خەڵکی کوردستان ئومێدیان بە حزبە ناسیۆنالسیت و ئیسلامیەکان ماوە؟!
دوای تەواو بوونی بەرنامەکە زیاتر لە سەدا نەوەت و پێنجی ئەو خەڵکەی کە رایان پرسرا، وتیان کە هەر ناچن بۆ هەڵبژاردن، بەڵام لە دوو توێی ئەم باس و راپرسیانەدا چیرۆکی سەیروسەمەرەیان دەگێڕایەوە دەربارەی هەڵبژاردن و ئەو بەڵێنانەی کە لەکاتی هەڵبژاردندا بە خەڵکیان داوە و چۆن دواتر وەک و بڵقی سەر ئاوو چوون بە هەوادا، لەم گۆشە نیگایەوە نەفرەتیان لە هەڵبژاردن و سەرجەم دەسەڵاتی ئەم حزبانە دەکرد، دەیان گووت کە نە هەڵبژاردن و نە دەسەڵاتەکەیان هیچ تەباییەکی لەگەڵ بەرژەوەندیەکانی خەڵکی کوردستان نیە، هەموو هەوڵ و تەقەلایان بۆ کۆکردنەوە و کەڵەکەی سەرمایەکانی خۆیان و قایمکردنی دام و دەزگا و دەسەڵاتەکەیانە، ئەوەی کە بە هیچ جۆرێک دەربەستی نایەن ژیان و گوزەرانی خەڵکە، خەڵک برسی و بێکارن، نەخۆش و نەدارن، بێ دکتۆر و دەرمانن، سەرەتایترین پێداویستی ژیانی خێزانەکانیان بۆ دابین نابێت، ئەمانە و دەیان کارەساتی تر بەرۆکی بە خەڵک گرتووە و دەسەڵاتدارانیش خۆیان لێکەڕ کردووە و هیچ بەرپرسیارێتیەک نیشان نادەن، هەر جۆرە چاوەڕوانیەک بۆ ئایندەیەکی باشتر لە سایەی دەسەڵاتی ئەم حزبانەدا خەياڵێكه جگە لە رۆبردنی کۆمەڵگا بۆ ناو کارەسات و تاڵاوی زۆرتر هیچ ئاکامێکی نابێت.
خەڵکی کوردستان نەک هەر نابێ چی تر بە گاڵتەجاری ئەوان فریو بخۆن و بەشداری لە سیناریۆی بە ناو هەڵبژاردنیان بکەن، بەڵکو دەبێ نەفرەت لەو سیناریۆیە و لە دەسەڵات و دام و دەزگاکانیان بکەن، زیاتریش لەوە خەڵکی توڕە و برسی و ناڕازی دەبێ ئەو سیناریۆ گاڵتەجاڕیە ناکام بکەنەوە کە دەیەوێ مەشروعیەت بەم دەسەڵاتە فريوكاره بدات و پەنجە مۆری خەڵکی بۆ وەرگرێت، دوای چارەکە سەدەیەک لە دەسەڵاتی ئەمانە، دوای چەند خولی فڕوفیشاڵ و فریوکاریان و تێپەڕاندنی چارەکە سەدەیەک بە بەڵێن و تەفرەکاری، ئێستا بە تەواوی دەستی هەموو ئەم حزبە قەومی و ئیسلامیانە بۆ خەڵک ئاشکرا بووە و ئەنجامی ئەمەش کردوێتی بەو نەفرەت و توڕەیەی خەڵک بەرامبەریان، ئەم چارەکە سەدەیە روونی کردووەتەوە کە ئەمانە نەک هەر ناتوانن ببنە چارەسازی ئەم دۆخە کارەساتبارە بەڵکو خۆیان کێشەی هەرە گەورەی ئەم کۆمەڵگایەن.
مەسەلەیەک کە هەمیشە ئەم دەسەڵاتە بى دەربەست و ستەمگەر و گەندەڵە شانازی پێوە دەکات و بەڕووی ناڕەزایەتیەکانی خەڵکیدا دەداتەوە، ئەوەیە کە دەڵێن لەسەدا حەفتای خەڵکی کوردستان دەنگی بە دەسەڵاتی ئێمە داوە، بەم جۆرە دەڵێن تا ئەم شەرعیەتەمان هەبێت لەلایەن خەڵکەوە ئەوە بکوژ و ببڕی ئەم کۆمەڵگایە هەر خۆمانین.!!!
بەڵام ئەوان ئێستا لەدۆخی وادا قەراریان گرتووە کە زۆربەی هەرە زۆری خەڵک نەفرەت لە خۆیان و دەسەڵاتەکەیان دەکات، بەشی هەرە زۆری خەڵک دەڵێن ئیتر پەنجەی خۆمان ئەقرتێنین ئەگەر دەنگ بەمانە بدەین. لە راستیدا ئەوان دەمێکە ئەو شەرعیەتەیان لە دەستداوە کە بە فریودان لە خەڵکیان سەندبوو، هاتنە سەرشەقامی فراوانی جەماوەر و ووتنی (نا) بە سیاسەت و بریارە قەرەقوشیاکانیان، هەروەها چاوقایمی دەسەڵات بەرامبەر ناڕەزایەتی فراوانی خەڵک و خۆ کەڕکردن لە ئاست داخوازیەکانی ئەو خەڵکەی کە بە سەرچاوەی شەرعیەتی دەسەڵاتەکەی خۆیانی دەزانن، ئیتر هیچ مەشروعیەێیکی بۆ دەسەڵاتەکەیان نەهێشتوەتەوە، ئیتر دەمێکە کە ئەم دەسەڵاتە تەنها بە زەبری خۆسەپاندن و سەرەنێزە و سەرکوت خۆی بەسەر سەری خەڵکەوە راگرتووە، لە راستیدا ئەم چەند ساڵە کوردستان بە بەرچاوی خەڵکی دنیاوە مەیدانی نەبەردی خەڵکی ستەمدیدە بوو لەگەڵ دەسەڵاتێکی به زەبر و زەنگ و گەندەڵ و ستەمکارو خۆسەپینی بنەماڵەیی، لە ئێستا بەدواشەوە خەڵکی کوردستان دەبێ بە نەخشەو پلانی رۆشنەوە خۆیان بۆ درێژەی ئەم نەبەردە و وەلانانی ئەم دەسەڵاتە لەسەر دڵیان ئامادە بکەن.
لەم رووەوە بەراستی سیناریۆی هەڵبژاردنی داهاتوو مەیدانێکی نەبەردی گەرم و گرنگی خەڵکی کوردستانە لە دژی ئەم حزبانە و لە دژی هەژاری و نەداری و بێدەرەتانی، ئەم حزبانە وەکو پیشەی هەمیشەییان لەگەڵ نزیک بوونەوەی وادەی هەڵبژاردن هەوڵدەدەن روویان لەگەڵ خەڵک خۆش بکەن و بە تەڵەکەبازی و فریودان دیسانەوە خەڵک راپێچی ئەوە بکەن کە دەنگیان پێ بدەن، بەڵام ئەمجارە نابێ خەڵک فریو بخۆن، لەم بارەیەوە هەڵویست وەرگرتن و بە دەنگی بەرز (نا) وتن بەم حزبانە و دەسەڵاتەکەیان پێویست و هەنگاوێکی چارەنوس سازە بۆ لەرزۆک کردنی دەسەڵاتی ئەم نوێنەرانەی چینی بۆرژوازی کورد، (نا) وتن بەم فریوکاریە، هەنگاوێکی گەورەیە بۆ راگەیاندنی نا مەشروع بوونی ئەم دەسەڵاتە، هەر بەم پێیەش ئەتوانێ سەرەتای هەلومەرجێکی شۆڕشگێرانە بێت کە لە پرۆسەی خەبات و ناڕەزایەتیەکی جەماوەری و رێکخراودا ئەم دەسەڵاتە گەندەڵە وەلابنێت و لە جێگایدا دەسەڵاتی شۆرشگێڕانەی جەماوەری کرێکارو زەحمەتکێش بەرپا بکات بۆ گرتنەبەری هەنگاوی خێرا بە ئاقاری چەسپاندنی ماف و ئازادی و خۆشگوزەرانی بۆ هەمووان.
چەند رۆژ دوای ئەم بەرنامە راپرسیە رۆژی ٦ی ئەم مانگە بوو کە حکومەتی هەرێم بڕیاریدا کە هەڵبژاردنی پەرلەمان و سەرۆکایەتی هەرێم لە رۆژی ٦-١١-٢٠١٧ ئەنجام بدرێت و زیاتر لە بیست ملیۆن دۆلاریش تەرخان کراوە بۆ خەرجی بەڕێوەچونی پرۆسەکەی.
با لە پەراوێزی ئەم باس و بڕیارەدا هەڵویستەیەک بکەین و بزانین دەسکەوتی خەڵک لە ماوەی دەسەڵاتی ئەم حزبە ناسیۆنالیست و ئیسلامیاندا چی بووە و تا چەند لە مەیدانە جۆراوجۆرەکاندا چونەتە پێش؟
بیست و شەش ساڵە خەڵکی کوردستان لە کابوسی دەسەڵاتی بەعس رزگاریان بووە و خەو بە ژیانێکی ئینسانی و خۆشگوزەرانەوە ئەبینن. بیست و شەش ساڵە خەڵک لە چاوەڕوانی ئەوەدان کە حکومەتی خۆماڵی کوردی ژیانێکی باشتری بۆ دابین بکات، بەڵام سەرئەنجام کارەسات لە دوای کارەسات، بێدەرەتانی و زوڵمی زیاتر، نەداری و تاڵانی، یەک بە یەکی خەونەکانی ئەو خەڵکەی بەبادا، تا ئەمڕۆ ئیتر قورسایی نەهامەتیەکان پێویستە خەڵک لەو خەونە راچڵەکێنێ و چیتر بێ هودە ئومێد بە ژیانێکی باشتر و ئاسودەیی بە دەسەڵاتی ئەم گەندەڵ و فريوكارانه گرێنەدەن.
چیتر نابێ خەڵک بە حیکایەتی پوچی “پرۆسەی دامەزراندنی دیموکراسی دورودرێژە، دەسەڵات بەرنامەی چاکسازی هەیە، دەسەڵات دەکەن بە دامەزراوەیی و میلیشیاکان دەگۆڕین بە هێزی نیشتمانی، لە رێگای پەرلەمانی کارتۆنی و یاساو دەستەی دەست پاکی و قەوانی ستۆکی بەم جۆرەوە، ئومێدەکانی خەڵک مسۆگەر دەکەن” فریو نەخۆن. دەنگدان بە هەر یەک لەم حزبە مافیانە، دەنگدانە بە بەردەوامی هەژاری و نەداری و تاڵان و بڕۆ، دەنگدانە بە نەمانی ئاسەواری خزمەتگوزاریە هەرە سەرەتاییەکان، دەنگدانە بە بەرزتر بونەوەی قەلای سەروەتی بنەماڵەيى و دەوروبەرەکانیان لەسەر حیسابی هەژاری موتڵەقی ملیۆنەها خەڵک، دەنگدانە بە تیرۆری هەڵسوڕاوانی سیاسی و رابەرانی ناڕەزایەتیەکانی خەڵک و رۆژنامەنوسان و رەخنەگرانی ئەم دەسەڵاتە ستەمکارە، دەنگدانە بە بکوژانی قوربانیەکانی بزووتنەوەی ١٧ی شوبات، دەنگدانە بە بڕینی موچە و کرێ و قوتی خەڵک و شیری منداڵ و دەرمانی نەخۆش.
دەنگ نەدان بەم حزبانە و لەوەش زیاتر (نا) وتن بە دەسەڵاتی ئەم حزبە قەومی و ئیسلامیانە، هەڵویستێکی شایستەیە بۆ هەموو ئەو جەماوەرەی کە چارەکە سەدەیەکە خەون بە رۆژگارێکەوە دەبینن کە خەمی ئاوی خواردنەوە و کارەبا و سەرەتایترین خزمەتگوزاریەکانیان نەبێت، نە تەنیا ئەوەندە بگرە ئەرکی هەموو هاوڵاتیەکی ئازادیخوازە کە بە فراوانی بانگەوازی دەوروبەرەکەی بکات بۆ ئەم (نا) وتنە و هاوکاریان بکات بۆ ئەوەی دیسانەوە لە سەروبەری هەڵبژاردندا بە هیچ بەڵین و بە هیچ چەواشەکاریەکی نەتەوەپەرستی و خورافات و مێشک داشۆرینێک فریو نەخۆن و دەنگدان بە دەسەڵاتی یەکێک لەم حزبە ستەمکارانە نەدەن، چونکە بەم جۆرە کۆتی کۆیلایەتی لە دەست و پێی خۆیان و جەماوەری چەوساوە توندتر دەکەنەوە.
مارسی ٢٠١٧
