hkkurdistan
رێبوار ئەحمەد
سەرجەم میدیاکانی جیهان و لێدوانی فەرمی دەوڵەتانی هاوپەیمانی بە ناو “شەڕی دژی داعش و تیرۆریزم” باسی نزیکبونەوەی ئەو کارەساتە سامناکە دەکەن کە ناویان ناوە “ئۆپەراسیۆنی ئازدی موسڵ و لەناوبردنی داعش”. لە راستیدا ئەم ئۆپەراسیۆنە هەر ئێستاو لەدەمێک پێش ئێستاوە لەچەندین جێگا دەستیپێکردوەو لەئارادیە. لەڕومادی و فەلوجە و گیارەو ..و ..ئەگەر لەودیوی پڕوپاگەندەی چەواشەکارانەی ئەمریکا و غەرب و هاوپەیمانە ناوچەییەکانیانەوە سەرنجێکی کورت هەر لەم ئاستە لەبەڕیوەچونی شەڕی دژی داعش بدرێ، ئەوەندەی بەڵگەی ئاشکرای بەدەستەوەداوە کە ناوەڕۆک و ئاکامی راستەقینەی ئەم شەڕە و ئۆپەراسیۆنی داهاتوی موسڵیش ببینرێت. هەموو ئەو شار و ناوچانە بە بەهانەی لەناوبردنی داعش و بەرلەوەی لەدەست داعش دەربهێنرێن کراون بە گۆڕستان و کوشتاری بەکۆمەڵی خەڵکی بێگوناهو قوربانی دەستی تیرۆریزم و دڕنده‌یی داعش. چ لە ئەنجامی وێرانکاری داعش و چ لە ئەنجامی ئەو هەموو بۆمبە کۆمەڵکوژانەی گوایە بۆ ئازاکردنی ئەو ناوچانە خراونەتە خوارەوە، ماڵ و حاڵ و قوتابخانە و نەخۆشانە و هەموو سیمایەکی مەدەنیان خاپورو وێرانکردوە بەسەرخەڵکەکەیدا. جگە لەوەش دەیان و سەدان بەڵگە نیشانیدەدات کە حشدی شعبی و سوپای عێراق و میلیشیا تائیفیە شیعەکان، کوشتارێکی بێشوماریان کردوە لەو خەڵکانەی کە توانیبویان بەهەر دەردەسەریەک بێت گیانیان لەچەقۆی داعش و بۆمبارانی هاوپەیمانی دژی داعش بەدەربەرن. تا ئەو رادەیەی کە رای گشتی جەنابی عەبادی ناچارکرد کە بەناوی “لیژنە دروستکردن بۆ لێکۆڵینەوە لەو تاوانانە” لیژنەو سیناریۆی گاڵتەجاڕانە بۆ دیزەبەدەرخۆنە کردنی سازبکات. رون و ئاشکرا ئەوە لەبەرچاوی خەڵکی ئازادیخوازدایە کە ئاوارەکانی ئەو ناوچانەی بۆ زیاتر لەساڵێک دەچێت لەدەستی داعش دەرهێنراون، ئامادەنین و جەسارەت ناکەن بگەڕێنەوە سەر ماڵوحاڵی وێرانکراویان، بەتایبەتیش لە ترسی ستەم و کوشتاری تائیفی میلیشیا شیعەکان.
ئێستا لەگەڵ توندبونەوەی هێرشو بۆمبارانی کوێرانەی هاوپەیمانەکان، خەڵکی ناوچەکانی ژێردەسەڵاتی داعش بەلێشاو هەوڵی خۆدەربازکردن دەدەن بۆ ناوچەکانی تری عێراق. لەم کاتەدا لە جیاتی ئەوەی هێزە چەکدارەکانی بەرەی دژی داعش پێشوازیان لێبکەن و بە هانایانەوە بڕۆن و کارئاسانیان بۆ بکەن، لەلایەن حشدی شەعبی و میلیشیا شیعەکانەوە کوشتاریان لێدەکرێت. ئەوانەشی روودەکەنە کوردستان لەگەڵ جۆرێکی تر لە نەهامەتی بەرەوڕودەبن. سیاسەتی ناسۆنالیستی و بیر و قینی نەتەوەپەرستانەی دەسەڵاتی کوردی کە حوکمڕانی بەسەر هێزی پێشمەرگە و هێزە ئەمنیەکانی کوردستاندا دەکات، بە بەهانەی بەرگرتن لە دزەکردنی داعش، هەزارو یەک جۆر رێگریان لێدەکرێت بۆ ئەوەی نەتوانن خۆیان بگەیەننە ناوچەکانی کوردستان. تەنانەت ئەوانەشیان کە دەتوانن بەهەر دەردو چەرمەسەریەک ئەم دیوارو رێگریانە ببڕن، دیسان رق و کینەی کۆنەپەرستانەی قەومی و هاندانی رەوتە نەتەوەپەرستەکان، لە هەوڵی هەڵخڕاندنی فەزایەکە کە لە جیاتی ئەوەی ئەم خەڵکە پەناهێنە وەکو مرۆڤی ئاوارەو لێقەوماو تەماشا بکرێن و بە گیانی هاوپشتیەوە پێشوازیان لێبکرێت، لە پێشدا وەکو “عەرەبی داعشی” چاویان لێدەکرێت، یان بە بەهانەی پڕوپوچ و کۆنەپەرستانەی مەترسی لەسەر گۆڕینی دیمۆگرافی کوردستان، قوڵکردنەوەی قەیرانی ئابوری، زیادکردنی بێکاری، وە سەرئەنجام ئاسایشی کوردستان لە دزکردنی خۆکوژانی داعش، فەزای کۆمەڵگا لە دژیان هەڵدەخڕێنرێت.
خەڵکی ئازدیخوازی کوردستان دەیان ساڵە قوربانی دەرمارگیری نەتەوەپەرستین. چاندن و قوڵکرنەوەی رق وکینەی نەتەوەپەرستی یەکێک بوو لە کۆڵەکەکانی راگرتنی دەسەڵاتی نگریسی رژێمی فاشیتی بەعس. ئەو رژێمە نەک وەکو نوێنەر و ئیرادە و بەرژەوەندی خەڵکی عەرەبزمان، بەڵکو وەکو نوێنەری چینی بورژوازی نەتەوەپەرستی عەرەب، سیاسەتی پاکتاوی قەومی لەبەرامبەر خەڵکی کوردزمان بەڕێوەی دەبرد. هەر ئەم سیاسەتی نەتەوەپرستیە عەرەبیەی بەعس بوو کە توانیبوی بەشێک لە جەماوەری کرێکارو زەحمەتکێشی خەڵکی عەرەبزمان بکات بە ئامرازی دەستی ئەو رژێمە لە بردنەپێشی سیاسەتی فاشیانەی تەعریب و سەرکوتی خەڵکی کوردستاندا. هەر ئەو رژێمەی کە واینیشاندەدا خەڵکی کوردستان بۆ بەرژەوەندی خەڵکی عەرەبزمان پاکتاو دەکات، بە ئاگرو ئاسن و داپڵۆسین وەڵامی هەر دەنگێکی ناڕازی و خواست و ویستی خەڵکی کرێکارو زەحمەتکێشی عەرەبیشی دەدایەوە. لەبەرامبەردا بورژوازی کوردو بزوتنەوەی کوردایەتی و نەتەوەپەرستی کوردی، کە ئامانج و ئاواتی ئەوەبوو لە دەسەڵات و بەری رەنج و چەوسانەوەی چینی کرێکارو جەماوەری زەحمەتکێش بەشی خۆی هەبێت، هەوڵیداوە ئەو نەریت و بیروباوەڕە لە ناوخەڵکی کوردستان پەرەپێبدات کە نەتەوەپەرستی بە نەتەوەپەرستی وەڵام بدرێتەوە، تا بەم جۆرە بتوانێ جەماوەری ستەمدیدەی کوردستان بخاتە پشتی ستراتیجی سیاسی خۆی بۆ گوشاردانان لەسەر رژێمی بەعس و ناچارکردنی بەشەریکردنەوەیان لە دەسەڵات و دەسڕەنجی چەوساوەکان، بەناوی ئۆتۆنۆمی و رزگارکردنی خەڵک لە ستەمی نەتەوایەتی. مێژوو شایەتە هەرکات رژێمی بەعس ترۆسکایی و سوکە ئومێدێکی پێدابن، نەک هەر بێدەنگی و چاوپۆشیان لەهەموو بەربەریەت و دڕندەیی بەردەوامی رژێمی بەعس کردوە، بەڵکو لاملی سەدامیان ماچ کردوە و ستایشیان کردوەو نازناوی پڕشانازیان بۆ داتاشیوەو هەوڵیانداوە توڕەیی خەڵکی کوردستان هێمن بکەنەوەو بۆ سازان لەگەڵ ئەو دەسەڵاتە فاشیستە رازیان بکەن. سەرنجێک لە مێژووی رابردو چەندین بەڵگەی ئەم راستیەمان نیشاندەدات.
لە دوای جەنگی داگیرکردنی عێراقیش ٢٠٠٣ ەوە تاوەکو ئێستاش، بەپێی ئەو سیناریۆ کارەساتبارە قەومی و تائیفی و دینیانەی کە ئەمریکا کردی بە دیاری بۆ خەڵکی عێراق و ناوی نا “پرۆسەی ئازادی عێراق”، قۆناغێکی تر لە نەهامەتی ژیانی خەڵکی ئەم کۆمەڵگایەی لە زەلکاوی بێدەرەتانیدا نوقم کرد. ئەو خەڵکەی کە ساڵەها بوو وەکو هاوڵاتی و مرۆڤی هاوچارەنوس پێکەوە لە خۆشی و ناخۆشی یەکتردا بەشداربوون، لەسەر بناغەی تایفەگەری کردیانن بە دوژمن و خوێنخۆری یەکتری. قوربانیەکانی شەڕی تائیفی لەم ١٣ ساڵە لە عێراقدا لە ئەژمار نایه‌ت. لەهەردوو بەرەی ئەم شەڕ و ناکۆکی کۆنەپەرستانەیەدا، لێشاوێک لەو جەماورە ستەمدیدەیەی کە خۆیان بەدەست ستەمکاری بۆرژوازی ئەو تایفەیەی کە ناسنامەی چەپەڵ و ساختەی تایفی بۆیان داتاشیوەو دەردو نەهامەتیان دەچێشت، بوون بە قوربانی بەده‌سەڵات گەیشتن و لە دەسەڵات مانەوەی ئەوان. لە کاتێکدا جەماوەری کرێکارو زەحمەتکێش و خەڵکی بێدەرەتانی دەستەبەندی کراو بە شیعەو سونە، گەورەترین ستەم و چەسانەوە و زۆرداریان بەسەردا سەپێنراوە لەلایەن خودی ئەو هێزو لایەن و دەسەڵاتەی کە بەناوی نوێنەرایەتی تایفی ئەوان حوکمڕانی دەکەن، کەچی رێگای شەڕ و کوشتاری خەڵکی بێدەرەتانی تایفەکەی تریان پێنیشاندەدەن بۆ گەیشتن بە مافەکانیان. وردبونەوەیەکی زۆری ناوێ بۆ تێگەیشتن لەو راستیەی کە ئەم هێزە تایفیانە هەرکامیان وەکو بەشێک لە بورژوازی عێراق، نان لەو ناکۆکی و شەڕە تایفیانە دەخۆن کە لە ناو خەڵکی ستەمدیدەدا خوڵقاندویانە. لە کاتێکدا کە ١٣ ساڵە سەدری و بەدری و جەعفەری و مالکی و عەبادی..و… بە ناوی نوێنەرایەتی تایفەی شیعەوە حوکمڕانی دەکەن، کەچی جەماوەری ستەمدیدەی دەستەبەندی کراو بە تایفەی شیعە بە دەست زۆرداری و نەداری و ستەمکاری خودی ئەوانەوە بیداد دەکەن و رۆژانە دەڕژێنە سەر شەقامەکان. دۆخی ئەوانەش کە بە تایفەی سونە دەستەبەندی کراون و گوایە بە نوێنەرایەتی ئەوان و بۆ پاراستنی مافی ئەوان عەلاوی و هاشمی و نوجەیفی و موتڵەگی و جبوری..و…بەشە دەسەڵاتیان پێبڕاوە، زۆر کارەساتبارترە هەر لە خودی ناوچەی دەسەڵاتی سونە تایفەچیەکاندا.
هەر لەم بڕگەیەی مێژوی عێراقدا شایەتی قوڵتربونەوەی ئەو ناکۆکی و قڵشتە قەومیەین کە رژێمی بەعس لە نێوان خەڵکی کوردزمان و عەرەبزماندا چاندوبوی و ناسیۆنالیزمی کوردیش پێشوازی لێدەکردو نانی لێدەخوارد. دەسەڵاتی هەردوو بورژوزای کورد و عەرەب هەوڵیانداوە وا لە جەماوەری بەشمەینەت بگەیەنن، کە مافەکانیان لەورگی نەتەوەکەی تردایە و رێگای بەدەستهینانیشیان هەڵدڕینی ورگی ئەوانە. بەرزانیەکان و تاڵەبانیەکان و ئیسلامی و گۆرانەکانی دەسەڵاتداری کوردستان کە لەسەر بناغەی قەومی و گوایە وەکو نوێنەری خەڵکی کورد زمان هەم لە بەغدا لە دەسەڵات بەشدارو هەم لە کوردستان هەمەکارن، کەچی خەڵکی کوردستان بەدەست ستەمکاری و تاڵانچێتی ئەوانەوە بەدەنگهاتوە و کۆمەڵگا گەیشتوەتە لێواری ئیفلیج بوون. ئەمرۆ ئیتر ئەوە راستیەکی ئاشکرایە لای خەڵکی کوردستان کە بۆ کەمایەتیەکی سەرمایەدارو دەسەڵاتدارو دوو خێڵ و دەستوپێوەندەکانیان، ئەوەندە پارە هەیە کە بە ملیارها دۆلار لە بانکەکانی جیهان و ژێر زەمینه‌کاندا حەشاری بدەن، بەڵام کاتێک دێتە سەر قوتی رۆژانەی خەڵک و شیری منداڵ و دەرمانی نەخۆش دەڵێن قەیرانی دارییە و پارەکان لای عەبادیە. چ شتێک لەوە ئاشکراترە کە ناسیۆنالیزم و نەتەوەپەرستی و ناکۆکی قەومی بورژوازی کوردو عەرەبی لە ناو سەروەتدا نقوم کردوەو کرێکارو جەماوەری ستەمدیدەی کوردزمان و عەرەبزمانیشی نوقمی هەژاری کردوە؟!
بزوتنەوە ناسیۆنالیستی و تایفی و ئیسلامی، ژەهری نەتەوەپەرستی و تایفەگەری و دینی دەرخواردی خەڵک دەدەن بۆ ئەوەی خەڵک چەواشە بکەن و بیانکەن بە لەشکری پیادە و سوپای خۆیان بۆ شەڕ لەسەر دەسەڵات و پچڕینی بەشی خۆیان لە دەستڕەنجی چەوساوەکان و سامان و داهاتی کۆمەڵگا. ئەم جۆرە دەمارگیری و بەرچاو تاریکیە بۆ سەرلێشێواندن و خۆڵکردنە چاوی کرێکاران و چەساوەکان بەرهەم دەهێنرێت و مێشکی ئەوانی پێدەشۆردرێتەوە. رێگای خەبات و ئازادی و خۆشبەختی پێدەشاردرێتەوە و ئەو خەباتە بەرەو هەڵدێر دەبات. چۆن و بە کام پێوانە و لەسەر چ بناغەیەکی هوشیارانە و مرۆڤانە، دەکرێت ئەو جەماوەرە برسیەی لە کوردستان لەسەر شەقامن لەگەڵ تاڵانچیە کوردەکان برابن، ئەو جەماوەرە بیدەرەتانەی لە عێراق شیری منداڵەکانیان بۆ دابین نابێت لەگەڵ تاڵانچی و گەندەڵکارە ملیاردێرە عەرەب و تایفییه‌کاندا برابن، بەڵام ئەو کرێکارە کوردزمان و عەرەبزمان و تورکزمان بە شیعەو سونە دەستەبەندی کراوانە دوژمنی یەکتربن کە بۆ نمونە لە کۆمپانیا نەوتیەکان وەکو یەک کار دەکەن و رەنج دەدەن و ماندو دەبن، هەر وەکو یەکیش دەسڕەنجیان بە تاڵاندەبرێت، سەرسفرەو گوزەرانی خیزانەکانیان وەکو یەک وایە، تەنهاو تەنهاش پێکەوە دەتوانن ژیان و ئاستی گوزەرانی خۆیان و خیزانەکانیان باشتربکەن؟!
تێگەیشتن لەو راستیە زەحمەتێکی زۆری ناوێ کە قەومپەرستی بە قەومپەرستی وەڵام نادرێتەوە، تایفەگەری بە تایفەگەری وەڵام نادرێتەوە، هەر وەکو فاشیزم و رەگەزپەرستی بە فاشیزم ورەگەزپەرستی وەڵام نادرێتەوە. تەنها ئازادیخوازی و ئینسانیەت دەتوانێ هەموو ئەوانە تەفروتونا بکات و خۆشبەختی بۆ هەموان مسۆگەربکات. لە دنیای شارستانی سەدەی بیستویەکدا بەشەریەتی ئازادیخوازی نابێ گیرۆدەی ئەو بۆچون و بیرە پەرتوکاوە بێت کە “چاودەرکردن بە چاودەرکردن” وەڵامبداتەوە. ئەمە دروست ئەو بیرەیە کە داعشی هێناوەتە دنیاوە بۆ کوشتاری کوێرانەی مرۆڤایەتی و ئەم تێزە هەر بە کەڵکی داعش و داعشیزمی قەومی و تایفەگەری و رەگەزپەرستی دێت.
جەماورەی ستەمدیدە و ئازدیخوازی عێراق و کوردستان، لەسەرو شوناسە فریوکارنە و داتاشراوە قەومی و دینی و تایفیەکانەوە، یەک چارەنوس و یەک رێگای ئازدبونیان لەپێشە. پێویستە دەستخەنە ناودەستی یەکتر ریزێکی هاوپشتی بەهێز دروستبکەن، بۆ دەسکۆتاکردن و هەڵپێچانی دەسەڵاتی ئەو تاڵانچی و مشەخۆرو چاوچنۆکانەی بەناوی نوێنەرایەتی ئەم قەوم و تایفە و دینانەوە حوکمڕانی دەکەن و مەینەت بەسەر خەڵکدا دەبارێنن. ئەمڕۆ ئەم هاوپشتی و هاوچارەنوسیە لە هەموو کات پێویسترە! ملیۆنەها ئینسانی ستەمدیدە لە ناوچەکانی ژێر دەسەڵاتی داعشدا گیریانخواردوە. ئەم خەڵکە لە ناوەوە بەدەستی داعش و لە ئاسمانەوە بە بۆمباران و لەچواردەورەوە بەگڕی هێزی ئابڵوقەدەر دەسوتێن. خەڵکی عێراق و کوردستان دەتوانن و پێویستە بەهانایانەوە بێن و بەرگریان لیبکەن و لە دژی بۆردومانی کوێرانەی هاوپەیمانەکان و هێزە ئابڵۆقەدەرەکان دەنگ هەڵبڕن و رێگا نەدەن بە ناوی “شەڕی دژی داعش” دانیشتوانی مەدەنی کوشتارو ماڵوحاڵی خەڵک خاپور بکەن. پێویستە دەستی ئەو هێزانە ببەستن کە بە ناوی “عەرەب و داعش و سونە” خوێنی ئەم خەڵکە گیرخواردوە حەڵاڵ و رێگاکانی دەربازبونیان لێدابخەن. تاوانی ئەم خەڵکە هەر ئەوەیە کە بەدەر لە ئیرادەی خۆیان لەو سەرزەمینه لەدایکبونە کە بە زمانی عەرەبی قسە دەکرێت و لەژێر دەسەڵاتی چەتە تایفیە سونیەکاندایە ژیانی بێدەرەتانی ده‌گوزەرێنن. ئێستا ئەوان بە هەموو توانا هەوڵدەدەن لە جەهەنمی ژێردەستی داعش و لە گڕی بۆمباران خۆیان دەربازبکەن و بە لێشاوی هەزاران کەسی رودەکەنە ناوچەکانی تری عێراق و کوردستان. پێویستە خەڵکی ئەم ناوچانە داواکاری ئەوەبن هەموو سنورو دەرگاکان بەروی ئاوارەکاندا بکرێنەوە، پێویستە بە هانایانەوە بڕۆن و باوەشیان بۆ بکەنەوەو دەرگای ماڵه‌کانیان بەڕویاندا ئاوەڵابکەن و سفرەکانی خۆیانیان لەگەڵ بەش بکەن. پێویستە دەسەڵات و ناوەندە جیهانیەکان و دەوڵەتانی هاوپەیمان ناچاربکرێن ئاسایش و ژیانی گونجاو بۆ ئاوارەکان دابین بکەن. پێویستە لەلایەن خەڵکی ناوچەکانی تری عێراق و کوردستانەوه رێزیان لێبگرێ و لە هەرجێگایەک شایەتی ئەوەبن کە سوکایەتی یان رەفتاری کینەتۆزانە و نامرۆڤانەیان لەگەڵ دەکرێت، بەرامبەری بوەستن و بەرگریان لێبکەن. ئەمە لە نێو ئەم محنەتەدا رێگایەکە بۆ بەهێزکردنی گیانی هاوچارەنوسی و توڕهەڵدان لەو رق و کینە قەومی و تایفیانەی بۆرژوازی کە بۆ مەرامە کۆنەپەرستانەکانی خۆی لە ناو خەڵکدا دروستی کردوە. هیچ گومان لەوە نیە کە داعش هێز لە مامەڵەی خراپ و نامرۆڤانە لەگەڵ ئاوارەکان دەگرێت. ئەو ئارەزو دەکات ئەوانەی ناوچەکانی ژێر دەسەڵاتی بەجێدەهێڵن لە ناوچەکانی تردا بەگیانی نەتەوەپەرستانەو تایفەگەری مامەڵەی خراپ و دوژمنانەیان لەگەڵ بکرێت، بۆ ئەوەی ناچاربن چەکی داعش لەشان بکەن و لەگەڵ ئەودا بڕۆنە سەنگەرەوە. نابێ رێگابدرێت بەم جۆرە هاوکاری داعش بکرێت.
چاوێک لە دنیاو کۆمەڵگا پێشکەتوەکان بکەن! لەژێر گوشاری خەڵکی موتەمەدنی ئەو کۆمەڵگایانەدا دەوڵەتەکانیان ناچاربون بە ملیۆنەها خەڵکی پەنابەر پەنابدەن. ئەم خەڵکە ئازدیخوازە بەبێ گوێدانە پڕوپوچی گۆڕانی دیمۆگرافیای وڵاتەکەیان، بەبێ تەسلیمبون بە فڕوفیشاڵی قوڵبونەوەی قەیران و بێکاری، نەک تەنیا ئامادەن وبەرگری لەوە دەکەن کە بەشێک لە دەستڕەنجیان وەکو باج ببڕدرێت و بەشێکی تەرخان بکرێت بۆ دابینکردنی گوزه‌رانی پەنابەران، بەڵکو دەڕژێنە شەقامەکانەوەو خەباتێکی لێبڕاوانە دەکەن لەگەڵ راسیسزمی کۆمەڵگاکەیان و یاسا راسیستیەکانی دەوڵەتەکان بۆ بەرگری لە پەنابەران. لە ناو ئەو پەنابەرانەشدا بە ملیۆنەها خەڵکی کوردزمان و عەرەبزمانی هەر ئەم عێراق و کوردستانە هەن. خەڵکی ئازادیخوازی عێراق و کوردستان دەبێ لەو نەریتە شارستانیە ئیلهام وەرگرن. ئەمە رێگایەکی کارایە بۆ دەرهێنانی بەڕە لەژێر پێی داعش. هاوکات دەبێتە بناغەی هاوپشتیەکی بەهێز لە نێوان کرێکاران و جەماوەری سته‌مدیدەی عێراق و کوردستان و هەنگاوێکی گەورە بۆ کۆتایهێنان بەکارەساتی شەڕو ناکۆکی قەومی و تایفی ودینی، هەروەها یەکڕیزی خەباتی چەوساوەکان لەسەرو ناسنامە داتاشراوەکانەوە بۆ کۆتایهێنان بە ستەم و زۆرداری و هەڵاواردن. کرێکاران و جەماوەری زەحمەتکێش بەدەر لەوەی بە هەر زمانێک قسەبکەن و باوەڕیان بە چ دین و مەزهەبێک هەبێت یان نەبێت، نابێ رێگابدەن جگە لە ناسنامەی ئینسانی هیچ ناسنامەیەکی تر نە بۆ خۆیان نە بۆ خەڵکانی تر دابتاشرێت. نابێ جگە لەو دابەشبونە چیانیەتیە واقعیەی کە بۆ کەمایەتیەک بەهەشت و بۆ جەماوەرێکی گەورە هەژاری و نەهامەتی خوڵقاندوە، هیچ دەستەبەندیەکی ساختەی دوبەرەکی ئامێز لە نێوان هاوڵاتیان و رەگەزی بەشەری قبوڵ بکەن. ئەمڕۆ دوای نزیکەی سەدەو نیوێک لە بەربەریەتی سەرمایەداری، دروشمە بەناوبانگە ئەنتەرناسیۆنالیستی و مرۆڤانەکەی کۆمۆنارەکانی پاریس، بە دەنگی بەرز بانگەوازی کرێکاران و جەماوەری ستەمدیدەو خەڵکی موتەمەدن دەکات، کە هاواریانکرد؛ مەرگ بۆ فەرەنسا! بژی ئینسانیەت! …رێگای ئێمە و دروشمی ئێمەش بریتیە لە مەرگ بۆ هەڵاواردن و ناکۆکی و جیاکاری قەومی و دینی و تایفی! بژی هاوپشتی و هاوچارەنوسی کرێکاران و جەماوەری ستەمدیدە!
١٣ی ئۆکتۆبەری ٢٠١٦
