هەڵبژاردن  و تارمایی خرۆشانی جەماوەر!

موحسن کەریم:

خرۆشانە جەماوەریەکانی ئۆکتۆبەری ساڵی ٢٠١٩ی شارەکانی عێراق، تارمایی شۆڕشی جەماوەری پیشانی دەسەڵاتی میلیشیایی بۆرژوازی دا کە سەرەنجام، قەیرانی سیاسی و حکومەتیی قوڵ کردەوەو سەرۆک وەزیرانەکەی و کابینە وەزاریەکانی پێچایەوە!

بۆرژوازی جیهانی و عێراقی بۆ دەربازبوون لەو گێژاوو بنبەستەی سیستەمی سیاسی- ئابوری سەرمایەداری لە عێراق گیرۆدەی بوو بوو بەدەست ناڕەزایەتی و خرۆشانی جەماوەری کرێکارو زەحمەتكێش و وەتەنگهاتووی عێراقەوە، چەندین کارتی بەختیان ڕاکێشا و سەرەنجام  کارتی مستەفا کازمیان وەکو فریشتەی رزگاری بۆ دەرچوو کە لەسەر کورسی سەرۆك وەزیران نیشتەوە تا لەجیاتی حکومەتی هەڵوەشاوەی پێشوو حکومەتێکی کاربەڕێکەری کاتی دروست بکات، بە ئومێدی ئەوەی توڕەیی و خرۆشانی جەماوەری هێوربێتەوە و زەمینەی تێپەڕاندنی قەیرانی سیاسی و حکومەتی فەراهەم ببێت. ئەوەبوو ڤایرۆسی کۆرۆناش وەکو دیاریەکی ئاسمانی فریای بۆرژوازی عێراقی کەوت و بەناچاری، خۆپیشاندەران، کە سەرەڕای زیاتر لە ٦٠٠ قوربانی ونزیکەی ١٢هەزار بریندارهێشتا ئامادە نەبوون لەژێر فشاری کوشتاردا مەیدان چۆڵ بکەن، بەهۆی مەترسی بڵاوبوونەوەی کۆرۆناوە گۆڕەپانەکانی چۆڵکرد!

هاوکاتی چۆڵبوونی گۆڕەپانەکان و هێوربونەوەی خۆپیشاندانەکان، هێزە میلیشیا بۆرژواییەکان کە دەسەڵاتی دەوڵەتیان بەدەستەوەیە، کەوتنە ڕاونان و تۆقاندن و تیرۆرکردنی ڕابەران و رێکخەرانی خۆپیشاندانەکان و بە سەپاندنی فەزای سەرکوت داپڵۆسین، هەوڵیان دا پاشەکشە بە جەماوەری ناڕازی و ڕاپەڕیوو بکەن و تەسلمیان بکەن. ئەگەرچی هاتنی کازمی بۆسەر کورسی دەسەڵات ئاکامی جۆرێك لە خۆشباوەڕیی بەشێك لە خەڵکی ناڕازی و خۆپیشاندەران بوو، بەڵام سەرەنجام کازمی و حکومەتەکەی و حزب و گروپە چەکدارە دەسەڵاتدارەکان لەرێگای بەڕێخستنی سەرکوتی رێکخراوەوە زەمینەکانی هەڵبژاردنی پێشوەختیان بۆ بۆرژوازی لە عێراق دەستەبەرکرد.

هەڵبژاردنی پێشوەختەی عێراق، رێك بە ئامانجی وەشاندنی دوا زەبرە لە بزوتنەوەی ناڕەزایەتی خەڵك و خرۆشانە جەماوەریەکانی ساڵی ٢٠١٩ کە دەسەڵاتی بۆرژوازی لە عێراق گیرۆدەی قەیران کردو حکومەتەکەی پێچایەوە! ئەم هەڵبژاردنە دەیەوێ کە فەزایی ناڕەزایەتی جەماوەری خامۆش بکات و قەیرانی سیاسی بۆرژوازی ئەگەر پێ چارەسەر نەکرێ، هێوری بکاتەوەو ئەگەرەکانی سەرهەڵدانی شۆڕشی جەماوەری چینی کرێکار و زەحمەتکێشی عێراق لە دژی دەسەڵاتی تاڵانچی و چەكبەدەستی بۆرژوازی دوور بخاتەوە. ئەم هەڵبژاردنە ئامانجی ئەوەیە کە سەقامگیری سیاسی بۆ بۆرژوازی عێراقی دەستبەربکات. دەیەوێ هەلومەرجی چەوساندنەوە و بێمافیی چینی کرێکارو زەحمەتکێش، دوای دەورەیەك لە خەبات و قوربانی و هاتنەمەیدانی جەماوەر لە زۆربەی شارەکانی عێراق بۆ کۆتایی هێنان بەو بارودۆخەو بەو نایەکسانی و ستەم و زوڵم و بێدادی و بێمافیە، سازبداتەوەو پارێزگاری لێبکات. بۆیە پێگە و جێوشوێنی ئەم هەڵبژاردنەی عێراق، بەبەراورد بە هەڵبژاردنەکانی پێشتر، رێك لەبەرامبەر ئاماج و ئاواتەکانی خەڵکی عێراقدایە بۆ یەکسانی و عەدالەتی کۆمەڵایەتی.

ئەم هەڵبژاردنە بلۆفێکی سیاسی و قێزەونی لەڕادەبەدەر کۆنەپەرستانەیە دژ بە چینی کرێکار و جەماوەری بێبەشی عێراق. خەڵکی عێراق رژانە سەر شەقامەکان بۆ روخاندن و کۆتاییهێنان بەم دەسەڵاتە نایەکسان و گەندەڵ و تاڵانچی و میلیشییایە، بەڵام ئەم هەڵبژاردنە دەیەوێ ئەو هەلومەرجە بهێڵێتەوە کە جەماوەر دژی ڕاپەڕین. کەواتە هەڵوێستی دروستی سیاسی کە دەبێ خەڵکی عێراق و کوردستان بیگرنەپێش ئەوەیە کە دژی هەڵبژاردن بوەستنەوە، دژی هێشتنەوەی بارودۆخێك کە دژی ڕاپەڕین بوەستنەوە و ملی پێنەدەن و رێگا نەدەن کڵاویان بکرێتە سەر. ئەوەش بەوە دەکرێ کە دیسانەوە خۆیان بۆ ڕوبەڕووبونەوەی دەسەڵات و هەڵبژاردن و پەرلەمان و حکومەتەکەیان ئامادە بکەن. نەك هەر بەشداری ئەم پیلانگێڕیەی بۆرژوازی و حزب و دەستەو تاقمەکانی  لەدژی خۆیان و خەبات و قوربانی دانەکانیان نەکەن، بەڵکو ئاڕاستەی هەڵبژاردن لەدژی بۆرژوازی و دەسەڵاتەکەی هەڵبگێڕنەوە. بە دەنگی بەرز بڵێن نا بۆ هەڵبژاردن و دەسەڵاتی تاڵانچی و کۆنەپەرست و دژە شۆڕشی ئێوە. بەڵێ بۆ دەسەڵاتدارێتی جەماوەری …  هەر لەئێستاوە، لەپاڵ بانگەشەی کاندیدەکانی گروپ و هێزە میلیشاییەکانی بۆرژوازی، خەڵک کۆبونەوەی گشتی خۆیان بکەن و لەسەر پرس و مەسەلەکانی خۆیان و لەسەر ماف و داواکاریەکانیان گفتوگۆ بکەن و پێکەوە هەنگاو هەڵبگرن بۆ جێبەجێکردنیان. ئەوەش بەوە دەکرێ کە ئەو کۆبونەوە گشتیانە بگۆڕن بۆ شورا و ئەنجومەنە شۆڕشگێرەکانی خەڵك لە گەڕەک و شارەکان و دەسەڵاتی محەلی خەڵك لە هەموو جێگایەك دابمەزرێت. دەبێ لەبەرامبەر دەسەڵاتی بۆرژوازی لەسەرەوە کە هەڵبژاردنی پێشوەختە دەیەوێ ساخی بکاتەوە، دەسەڵاتی خەڵك لە خوارەوە دروست بکرێت. بەوەش قەیرانی حکومەتی و سیاسی بۆرژوازی قوڵتر دەکرێتەوەو پیلانەکەیان دژی خەڵك و بۆ هێشتنەوەی هەلومەرجی پڕ لە چەوساندنەوەو ستەم ونایەکسانی وبێمافی بۆ دوورخستنەوەی ئەگەری شۆرش پووچەڵ بکەنەوە!