جەنگی ناشێلگیرانە دژی داعش!

رێبوار ئەحمەد:
داعش وەکو هێزێکی دڕندەی ئسلامی مستەحەقی تەفروتونابونە. هەر هێزێک بیەوێ شێلگیرانە ئەم کارە بکات، لەوانە ئەگەر ئەمریکای سەرکردەی جیهانی تیرۆریزمی دەوڵەتیش بێت، وە ئەگەر بەپێی مەرام و ئامانجەکانی مستەحەقی پشتیوانیش نەبێت، لانی کەم نابێ خودی جەنگەکەی سەرکۆنە بکرێت. بەڵام ئەمریکا نایەوێ ئەم کارە بکات و پێشتر باسمان کردوە، ئەو خۆی داعشی خوڵقاندوەو ئێستاش تەنها یاریەکی سیاسی بەم مەسەلەیەوە دەکات. لە پێشدا بە لێدان لە پشتی داعش لە ریگای بریکارە ناوچەیەکانی و پاشانیش بە هەڵکردنی ئاڵای فریوکارانەی “شەڕی تیرۆریزم” ئەم کەیسە بەکاریدەهێنێت بۆ بردنەپێشی سیاسەتی خۆی لە عیراق و سوریا و گشت رۆژهەڵاتی ناوەڕاستدا، بەمەبستی کورتکردنەوەی دەستی رەقیبە ناوچەیی و جهیانیەکانی لە ساحەی سیاسی عێراق و ناوچەکە و هەروەها ئارایشتدانەوەی هێزهاوسەنگی و دەسەڵاتی سیاسی لە عێراق و سوریا بە قازانجی هێزەکانی گوێڕایەڵی خۆی.  تەنها لەم ئاست و چوارچیوەیەشدا جارێک قوتکردنەوەی داعش و جاریکیتر فڕوفیشاڵی  “جەنگ لە دژی تیرۆریزم” و لێدانی داعش بۆ ئەمریکا جێگا پەیدا دەکەن. بەم جۆرە توانیویتی دەوڵەتانی غەربی لە پشتی سیاسەتاکانی خۆی ریزبکات. حکومەتی عێراقیش چ بە مالکی و چ بە عەبادیەوە زۆر بودەڵەترە لەوەی چاوەڕوانی شەڕی تێکشکاندنی داعشی لێبکرێت. ئەو لەبنەڕەتەوە خۆی جۆرە داعشێکی ترە . بە سیاسەت و کارکردی ئەم چەند ساڵەی وەکو حکومەتێکی بورژوازی سەرکوتگەر ناسیۆنالیستی-تائیفەگەری ئیسلامی شیعە و دەسکەلایەکی جمهوری ئیسلامی،  بە سەپاندنی بێمافی و ستەم و سەرکوت لە کۆمەڵگای عێراق و پیادەکردنی سیاسەتی ئاپارتایدی تائیفی و سەپاندنی ئابڵۆقە ونانبڕین بەسەر خەڵکی کوردستاندا، رۆڵی گەورەی گێڕاوە لە قوڵکردنەوەی ناکۆکی و کێشمەکێشە قومی و تائیفیەکان و بەم جۆرەش لە مەیداندارکردنی خودی داعشدا کە کەڵکی لەم ناکۆکی و ئاپارتایدە تائیفیە وەرگرتوە.
بەڵام بابزانین جەنگی حکومەتی هەرێم لەم بارەیەوە چ جێگاوڕێگایەکی هەیە؟ چەند مانگێکە شەڕی نێوان حکومەتی هەرێم و داعش لە ئارادایە. هەرجارەی لایەکیان ئەوی تریان لە چەند ناوچە رادەماڵێ، بێ ئەوەی هیچ نیشانەیەک لە کۆتایی و ئاکامی ئەم شەڕە دیاربێت، تا رادەی ئەوەی خەڵک ماندوبون لە بایەخدان بە هەواڵەکانی ئەم راوڕاوێنە. لە ١٠ی حوزەیرانەوە کە داعش موصل و ناوچەیەکی زۆری عێراقی خستوەتە ژێر دەسەڵاتی خۆیەوەو دوای ئەوەش بۆ چەند ناوچەیەکی تری کوردستان پێشرەوی کردوە، تا ئێستا لە هەندێک جێگا لەوانەی کە دوای ١٠ی حوزەیران دەستی بەسەردا گرتبوو وەدەرنراوە، بەڵام هیچ ناوچەیەک لەوانەی لێنەسەندراوەتەوە کە تا ئەوکات دەستی بەسەردا گرتبوو. بەم جۆرە بەرئەنجامی ئەم چەند مانگە لەشەری ئەم دوولایەنە بووە بەوەی کە چەند ناوچەی تازە وەکو شنگارو چەند شارو روبەری تر …بکەوێتە دەستی داعش. لەم جەنگەشدا هەردولایان “قارەمان” و سەرکەوتوو دەرهاتوون. داعش لەبەرامبەر پەلاماری هاوبەشی هەردوو حکومەتی عێراق و هەرێم بە پشتیوانی بۆمبارانی خەست و بەردەوامی ئەمریکاو هاوپەیمانەکانی نەک هەر خۆیان راگرتوە بەڵکو کەم تا زۆر پێشرەویشیان کردوە. حکومەتی هەرێمیش بە زیادەڕۆییەکی لەرادەبەدەرەوە خۆی بە خاوەنی ئەو سەروەریە دەزانێ کە بەزەبری هێزی پێشمەرگە نەک هەر سەروماڵی هاوڵاتیانی کوردستانی پاراستوە، بەڵکو هەموو جیهانی قەرزاری خۆی کردوە، چونکە “لە جیاتی هەموو جیهان شەڕی تیرۆر دەکات”. بەڵام هیچ ئاسۆو نیشانەیەکی ئەوە  دیارنیە کە ئەم شەڕە تاکەی بەم جۆرە بەردەوامدەبێت و بە چ ئەنجامێک دەگات؟
هەڵبەت هیچ لایەکی ئەم شەڕە تا ئێستا بێدەسکەوت نەبوە. هەرچەندە لە شەنگارو گوێرو جەلەولاو سەعدیە و قەرەتەپەو…ژماریەکی زۆر لە خەڵکی سیڤڵ بوون بە قوربانی، سەدان هەزار کەس روبەروی مەرگەساتی ئاوارەیی بون و  هەزاران کچ و ژن لە بازاڕی نیکاحی جیهادی چەپەلی ئیسلامیدا جەهەنمیان پێنیشاندرا، بەڵام حکومەتی هەرێم بە ئەندازەی پێویست پشتیوانی سیاسی و سەربازی و لۆجستی و پول و پارەی  پێگەیشتوە و هێزەکانی خۆی پڕچەک کردوە. بواری ئەوەی بۆ رەخساوە لە جەرگەی هەلومەرجێکی تازەی ناوچەکەو لە چوارچێوەی نەخشەی سیاسی ئەمریکاو غەربدا جێگاپێیەکی تازە پەیدابکاتەوە. چ هاتنەناوەوەی داعش و چ جەنگ دژی داعش دەرگایەکی بۆ کردوەتەوە کە لە کێشەکانی لەگەل حکومەتی عێراقیشدا سەنگێکی قورستری هەبێت. هاوکات بەهانەی ئەوەی دەسکەوتوە کە خۆی لە هەرجۆرە بەرپرسیارێتیەک بەرامبەر خواست و مافەکانی خەڵک بدزێتەوە. دەسکەوتی داعشیش دیارە چ لەرووی دەرکەوتنی سیاسی و دەسەڵات پەیداکردنەوە و چ لەرووی غەنیمەتی گەورەی شەڕی فتوحاتی ئیسلامی لە چەک و پارەو ژن بۆ هەوەسبازی ئاژەڵانەی ئەمیرەکانیان. لەم نێوەدا خەڵک هەم دەبێ قەرزارباری ئەوەبن کە گوایە سەروماڵیان پارێزراوەو هەم دەبی بە بەهانەی هەلومەرجی جەنگەوە مەحروم و خامۆشبن.
بەڵام پێش ئەوەی لە باسی لیکۆڵینەوەو قەزاوەت دەربارەی ناوەرۆک و ئامانجەکانی ئەم شەڕە زیاتر بڕۆینەپێش، ئاوردانەوەیەکی رەوتی روداەکان بە دیدێکی هەڵسەنگێنەرانە کۆمەک دەکات بەوەی بزانین ئەم جەنگە چۆن هاتەکایەوەو بە چ رێڕەوێکدا تێپەڕیوەو ناسیۆنالیزمی کورد چۆن مامەڵەی هەلومەرجەکەی کرودوە؟ سەرئەنجامیش ئەم جەنگە چ جێگایەکی هەیە لە جەنگی دژی تیرۆریزمدا؟

هێرشی داعش و بانگیشەی جیابونەوەی کوردستان:
با برێک وردتر چاو لە سیناریۆکە بکەین بزانین ئەم جەنگە لەسەرەتاوە چۆن هاتەکایەوەو چۆن دەستی پێکردو حکومەتی هەرێم چۆنی مامەڵەکردوە ؟….ئەگەر برێک بگەڕێینە دواوە بۆ سەردەمی ١٠ی حوزەیران. داعش بروسکە ئاسا بە هاوکاری هەمەلایەنەی بریکارە ناوچەییەکانی ئەمریکا بەتایبەت تورکیای دۆستی بارزانی و هەریم، بە چەند هەزار چەتەوە شاری موصل و دەوروبەری داگیرکرد. هێزێکی زەبەلاح و پڕچەکی سوپای عێراق بە فویەکی داعش و بەبێ تەقە تەفروتونابو و چەکەکانی بۆ داعش بەجێهێشت. سوپای عێراق لە ناوچە ناکۆکی لەسەرەکانیش کشایەوە. هاوڵاتیانی پارێزگای موسڵ و هەندێک ناوچەی کەرکوک و تکریت.و..هتد کەوتنەبەر مەرحەمەتی دڕندانەی داعش. لەم کاتەدا مسعود بارزانی رایگەیاند؛ ئەمە فرسەتە! ئەو ناوچە عەرەبیانە بە دانیشتوانەکەیەوە هەمووی پیرۆزی داعش بێت، ئەمە رۆژی جەژنی کوردە! چش لەوەی دانیشتوانی عەرەبی ئەو ناوچانە چیان بەسەردێت و دواتر داعش دەبێتە چ بەڵایەک بۆ هەموو ناوچەکە. لەم “فرسەتە زیڕینە”دا نزیک بە هەموو ناوچە ناکۆکی لەسەرەکان کەوتنەدەستی پێشمەرگە. ئینجا بارزانی وتی ئێمە کارمان بە داعش نیەو داعشیش کاری بە ئێمە نیە، ئەو ناوچانەی بەدەستیانهیناوە بۆ خۆیان و ئەو ناوچانەی بەدەستمان هێناوە بۆ خۆمان. مادەی ١٤٠ جێبەجێ بوو ئیتر باسی ناکەین. بە شانازی و لەخۆبایبونێکی زۆرەوە رایگەیاند؛ لە زوترینکاتدا ریفراندۆم دەکەین بۆ جیابونەوەی کوردستان و پێکهێنانی دەوڵەتی کوردی. هاوکاتی ئەمە هاندانێکی نافەرمی و پڕوپاگەندەو جموجۆڵێکی فراوانی راسیستی و قەومپەرستانەی دژی عەرەب بەڕێکەوت دەربارەی ئەوەی کە هەموو عەرەب بەوانەشەو کە ئاوارەی کوردستان بوون داعشن! ئەمە پاساوێکی پێویست بوو بۆ قۆستنەوەی “فرسەتە زێڕینەکەی” دوای هاتنی داعش و پشتکردن لە محنەت و کارەساتی ژیانی ملیۆنەها هاوڵاتی عەرەبزمان و غەیرە عەرەبزمانی ئەو ناوچانە. ریفراندۆم ئەگەر مانای دەنگدانی ئازادانەی خەڵک بێت، دەبێ لە فەزایەکی ئازادو ئارام و دور لە دەخاڵەتی هیچ هێزێکی سەربازی و چەکدار بەڕێوەبچێت و بەڕاستی خەڵک بتوانن بە رای ئازادی خۆیان بڕیار لەسەر ئایندەیان بدەن. کەچی بارزانی هەر لە پێشەوە ئەوناوچانەی کە دەیان ساڵە کێشەی لەسەرەو بڕیاربوو بە ریفراندۆم چارەنوسیان یەکلابکرێتەوە، لە فرسەتی هاتنی داعش و شکستی سوپای عێراقدا بە هێزی پێشمەرگە یەکلای کردەوەو هاتەسەر ریفراندۆم بۆ جیابونەوەی کوردستان بە ناوچانەشەوە. لە کاتێکدا بە پێی دوالێدوانی خودی دوو حزبی دەسەڵاتدار لە کاتی دوا هەڵبژاردنی پەرلەمانی عێراقدا کە گومان لەوە نیە بە قازانجی خۆیان دایانشکاندوە، لە پارێزگایەکی وەکو کەرکوکدا ٥١% ی کوردزمان و ٤٩% غەیرە کوردزمانە. ئەگەر بەپێی ئەو ئامارەی خۆشیان بێت و بەو گریمانە ناسیۆنالیستیەی کە هەموو کوردزمانەکانی کەرکوک بەبێ راپرسی بۆیاننوسرابێت کە دەنگدەدەن بەوەی ئەو پارێزگایە بخرێتەسەر مەملەکەتەکەی بارزانی، هێشتا بارزانی پێیناوە بەسەر ئیرادەو مافی راپرسینی ٤٩%ی دانیشتوانی ئەو پارێزگایەدا. ئەمەش ئاشکرایە کە ئەگەر بەو جۆرە ببڕایەتەوە، چ ئاشوب و نەهامەتیەکی بەدوادادەهات.
بنەمای پڕۆژەکەی مسعود بارزانی بریتی بوون لەمانە: یەکەم/ هێرشی داعش و داگیرکردنی موسڵ فرسەتە بۆ کورد. بۆ هەموو بەشەریەتی ئازادیخوازی دنیا سەرهەڵدان و دەسەڵات پەیداکردنی داعش کارەسات بوو، بەڵام بۆ ناسیۆنالیزمی کورد فرسەتی زێڕین و رۆژی کورد بوو. وەکو ئەوەی کورد جیاواز لە هەموو بەشەریەت جۆرێکیتر بێت لە مەخلوقات! دووەم/ بە خۆجوتکردن لەگەل سیاسەتی تورکیای پشتوپەنای داعش، هودنەکردنی  بەکردەوە لەگەڵ داعش و چاوپۆشیکردن لە بەربەریەتی ئەم هێزە بەرامبەر خەڵکی ئەو ناوچانەی کەوتبونە ژێردەستی. سێەم/ یەکلاکردنەوەی چارەنوسی ناوچە کێشەلەسەرەکان لە فرسەتی هاتنەناوەوەی داعش و شکستی سوپای عێراق، بە قازانجی ناسیۆنالیزمی کورد…چوارەم/ بانگیشەکردن بۆ ریفراندۆم و جیابونەوەی کوردستان بە مەبەستی فشارهێنان بۆ حکومەتی مالکی..بەدەرلەوەی بانگیشەکەی بارزانی تەنها جوڵاندن و خراپ کەڵک وەگرتن بوو لە سۆزی خەڵکی کوردستان بۆ مەرامێکی بە تەواوی جیاواز لە خواستی رەوای جیابونەوەی کوردستان، بەڵام یەک بەیەکی بنەما و کۆڵەکەکانی ئەم بانگیشەیە تا سەرمۆخ کۆنەپەرستانە، هەلپەرستانە، قەومپەرستانە، راسیستانە، نا ئینسانی و نابەرپرسانە، وە مایەیەی سەرکۆنەو ئیدانەبوو ئەگەر لە روانگەی مرۆڤایەتی و ئازادیخوازی و گەڕانەوە بۆ رای خەڵک و ریفراندۆمەوە لێیبڕوانین.

تراژیدی شەنگال و رۆڵی ناسیۆنالیزمی کورد:
گومان لەوە نیە کە داعش بەبەربەریەتی ئیسلامی کارەساتی شەنگالی خوڵقاندو ئەمە تاوانێکی دڕندانەیە لە ئەستۆی ئەو. بەڵام دەسەڵاتی ناسیۆنالیزمی کوردیش بەرپرسیارێتی راستەوخۆو گەورەی هەیە بەرامبەر ئەم کارەساتە. حزبەکانی کوردایەتی هەمیشە باوشیان بۆ ئاکامی کارەساتەکانی ژیانی خەڵک گرتوەتەوەو سیاسەتیان بۆئەوە داڕشتوە کە لە ئاکامی تراژیدیەکانی ئەم خەڵکەدا پێگەی دەسەڵاتی خۆیان بەهێزبکەن. هەم سەودای سیاسیان بە هەڵەبجە و ئەنفال و ئاوارەیی ١٩٩١ەوە ئاشکرایەو هەم رۆڵیان لە خۆلقانی هەریەک لەوانەدا..ئەمجارەش تراژیدی خەڵکی شنگار کرا بە دەستمایە بۆ بەدەستهێنانی پشتیوانی دەوڵەتانی غەربی لە ناسیۆنالیزمی کورد و پڕۆژە سیاسی و سەربازیەکانی. هاوکێشەکە زۆر سادەو ئاشکرابوو، سەرباری ئەوەی نزیکەی ٢ مانگ بوو مەترسی داعش بۆ هەموان ئاشکرابوو، سەرباری ئەوەی دوو مانگ بوو بانگیشەی ئەوە دەکرا کە پێشمەرگە لە ئامادەباشی تەواودایە بۆ ئەگەری هێرشی داعش و هێرشی داعش پیشبینی کراوبوو…ئەوە تەنها حکومەتی هەرێم و بە تایبەتی پارتی بوو کە بە خۆجوتکردن لەگەل سیاسەتی تورکیا و بە گرتنەپێشی سیاسەتی کەڵک وەگرتن لە هاتنەناوەوەی داعش، ئەمەی وەکو فرسەتی زێڕین بۆ کورد وێناکردو بانگیشەی ئەوەی دەکرد کە داعش کێشەی لەگەڵ کورد نیە. لە ئاکامیشدا داعش هێرشی کردو بەبێ ئەوەی روبەڕووی هیچ بەرگریەک بێتەوە تراژیدی شنگالی خوڵقاند.
وەکو هاوڵاتیانی شەنگار رۆژانی یەکەم لەسەر شاشەی تەلەفزیونەکانەوە باسیان دەکرد، لە دەمەوبەیاندا پێشمەرگە و هێزەکانی زرێڤانی بەبێ ئەوەی یەک فیشەک بۆ بەرگری بتەقیێنن شاریان بەجێهێشت….تا ئێستاش هیچ کەس وەڵامێکی راشکاوو بێپێچوپەنا بەو پرسیارە ناداتەوە کە ئەم سیناریۆیە چۆن و بۆچی رویدا…تەنها پاساو ئەوەیە کە چەکی داعش زۆر لە چەکی پێشمەرگە باڵاترە..! بەڵام پرسیار ئەوەیە کە لەو سەرەتایەوە لە شنگال کە هیچ بەرگریەک نەکرا، ناهاوسەنگی چەکی داعش و پێشمەرگە لەچیدا دەرکەوت؟! ئایا تەنانەت بوارێک نەبوو بۆ کردنەوەی رێگای دەربازبونی هاوڵاتیانێک کە لە سایەی دەسەڵاتی ئەواندا بێخەم بوون؟! لانیکەم بواری ئەوەش نەبوو خەڵک لە پلانی هەڵهاتنی خۆیان ئاگادارکەنەوە؟! بەم جۆرە لانی کەم لە هەموو روەیەکەوە ئەبعادی کارەساتەکە زۆر کەمتر دەبوەوە. ئەی دوای ئەوە بۆ بەو هەموو ئیمکانیاتەی لە بەردەستی حکومەتی هەرێمدایە، چەند مانگە و تائێستاشی لەگەل بێت خەڵکی ئاوارەی شنگالیان بەو شاخەوە بە برسێتی و لەبەردەم مەترسی داعشدا بە تەنها جێهێشتوە و تەنانەت ئامادەنین چەکیان پێبدەن بۆ بەرگری لە خۆیان؟ لە جیاتی فریاکەوتن چاوەڕوانی ئەوەن کارەساتەکە گەورەتربێتەوە و گفتیانداوە بە جینۆسایدی بناسێنن، بۆ ئەوەی وەکو ئەنفال و هەڵەبجە بەرهەمەکەی بخۆن. بەڕاستیش وەکو بەرهەمی ئەو تراژیدیایە خێروبەرەکەت بەسەریاندا باری.
لەڕاستیدا ئەمجارە خەڵکی شەنگال کران بە قوربانی سیاسەت و مەرامەکانی ناسیۆنالیزمی کورد. بەم جۆرە کارەساتێک خوڵقا کە جارێکیتر ناسیۆنالیزمی کورد بیکاتەوە بە دەستمایە بۆ جوڵاندنی سۆزی خەڵکی دنیا و بەڵگەیەک بۆ دەخاڵەتی میلیتاریستی ئەمریکا و دەوڵەتانی زلهێز کە هەمیشە ناسیۆنالیزمی کورد چاوی تێبڕیوە.. ئەمە یەکێک بوو لە شاڕێ خەتەرناک و ناقارەمانانەکانی بانگیشەی بارزانی بۆ دەوڵەتی کوردی. یەکەمین قوربانی ئەم سیاسەتە تێچونی خەڵکی شەنگال و ئاوارەبونی جەماوەرێکی بەرین لە گوێرو مەخمورو جەلەولاو سەعدیە و..و.. ..بوو. ئەم سەوداو مامەڵەیە بە ژیانی خەڵکی شەنگالەوە بە پێش چاوی دەیان لایەنی ناسیۆنالیستی چەپ و راستی کوردی لە هەر چوارپارچەی کوردستان رویدا، بەبێ ئەوەی هیچ کامیان وشەیەک بۆ سەرکۆنەکردنی ئەم سیاسەتەی حکومەتی هەرێم و بارزانی و رۆڵیان لە تراژیدی خەڵکی شنگاڵدا بەسەرزمان بهێنن.

شەڕی تیرۆر لە جیاتی هەموو دنیا:
حکومەتی هەرێم تا کاتێک کە بە خۆجوتکردن لەگەڵ سیاسەتی دەوڵەتی فاشیستی تورکیاو میحوەرە ناوچەیی و جیهانیەکەی، لایانوابوو کە بە هودنەو حەوانەوە لەگەڵ داعش و چاونوقاندن لە بەربەریەتی ئەم هێزە ئیسلامیە، دەتوانن سەنگی خۆیان لە هاوکێشەی سیاسی عێراق قورستر بکەن، هیچ ئەوەیان بۆ گرنگ نەبوو کە داعش جەهەنمی واقعی بەرپابکات بۆ ملیۆنەها ئینسانی هاوڵاتی خودی کۆمەڵگاکەی خۆیان لە عەرەبزمان و کوردزمان و تورکزمان، لە ئیسلام و مسیحی و یەزیدی و بێدین لە ناوچەکانی موسڵ و رۆژئاوای عێراق. کەچی دوای ئەوەی پەلاماری داعش بۆسەر خۆیان رایچڵەکاندن و پایتەختی دەسەڵاتی خۆیانی خستەمەترسیەوە، ئەوکات لافی شەڕی ئینسانیەت لەدژی داعشیان لێدا و بە ئەرکی مرۆڤایەتی و هەموو جیهانیان زانی پشتیوانی لە کورد بکات. ئەمە مەنتقی ناسیۆنالیزمی نەتەوەپەرستی کوردە “ئەگەر هێزێکی وەکو داعش هەر کارەساتێک بەسەر خەڵکی غەیرە کورددا بهێنێت بە مەرجێک کاری بەسەر کوردەوە نەبێت، لە روانگەی ناسیۆنالیزمی کوردەوە نەک هەر هیچ بایەخێکی ئینسانی نیە، بەڵکو دەکرێ فرسەت بێت بۆ کورد. بەڵام هەر کە هێرشەکە رووی لە کورد کرد، ئیتر مەسەلەیەکی ئینسانیەو ئەرکی هەموو مرۆڤایەتیە هاوکاری کورد بکات.” حزبە دەسەڵاتدارە ناسیۆنالیستەکان پێشتر هەرگیز لە هەڵگوتن بە هێزو توانای لەبننەهاتوی هێزی پێشمەرگە تێریان نەدەخوارد، بەڵام ئەمجارە بۆ بەدەستهێنانی  پشتیوانی سیاسی و سەربازی دەوڵەتانی غەربی، هێزی پێشمەرگەیان لە حەوت ساڵی راستکردەوە کە روت و رەجاڵە و بە کڵاشینکۆفی ژەنگاوی سەردەمی شاخەوە شەڕی چەکی پێشکەوتوی داعش دەکات. هاوکات گەورەترین کەمپینیان بۆ پیرۆزکردنی دەسەڵات و میلیشیاکانیان بەڕێخست، تەنها بە سرودو گۆرانی ستایشکارانە نەوەستاون، نەرێتی پرسوکایەتی تازە داهێنرا بۆ بە ئەفسانەکردنی پێشمەرگە، ژنە هونەرمەندی ناسیۆنالیست رایگەیاند ئامادەی نیکاحی جیهادە بۆ پێشمەرگە!.
ئەگەر پێشتر لە پشتدانی داعش لە رێگای بریکارە ناوچەیەکانی ئەمریکاوە رێگایەک بوو بۆ گۆڕینی هێزهاوسەنگی ناوچەکە دوای شکستەکانی ئەمریکا لە عێراق و سوریا، ئەوە لە بڕگەی دواتردا دەرکەوتن لە پۆزی رابەری جیهانی “جەنگی دژی تیرۆریزم” و بەرپاکردنی شەڕ دژی داعش، بەهانەیەکی تازەو گونجاوبوو بۆ دەخاڵەتی میلیتاریستی سەرلەنوێی ئەمریکا لە ناوچەکەو  لەنگەرگرتنەوەی  کارە تەواونکراو و سیاسەتە شکستخواردوەکانی پێشوی. ئەمە بنەماو مەبەستی ئۆباما بوو لە پلانی “سێ ساڵ جەنگ بۆ لەناوبردنی داعش”. لە چەند مانگی رابردودا فڕوفیشاڵی “جەنگی دژی تیرۆریزم” کە لە خانەی لەناوبردنی داعشدا هیچ رۆڵیکی نەبووە، بەڵام بە ئاقاری بەدیهێنانی مەرام و سیاسەتەکانی ئەمریکا لە ناوچەکەو بە تایبەتی لە مەیدانی سیاسی عێراق و پابەندکردنی دەسەڵاتی سیاسی عێراق بۆ خواستەکانی ئەمریکا، کاریگەری هەبوە. هەر بەم رادەیە ولەسەر بناغەی ئەم ئاستە لە چونەپێش، سیاسەتی تازەتری ئەمریکا رووی لەوەیە رۆڵی ئەم جەنگە بە ئاراستەی گۆڕینی هاوکێشەی سیاسی لە سوریاو لە دژی رژێمی ئەسەد درێژەبدات کە کۆڵەکەیەکی میحوەری رەقیبی ئەمریکایە لە ناوچەکەدا.  ناسیۆنالیزمی کورد کە دەمێکە ئاسۆی خۆی لەگەڵ ستیراتژی ئەمریکا لە ناوچەکەدا شەتەکداوە،  ئێستا کڵاو فڕێدادات بە ئاسماندا بۆ ئەوەی لە ریزی هاوپەیمانانی ئەمریکا لەم “جەنگی دژی تیرۆریزم”ەدا جێگایەکی پێببڕێت. ئەمە ناوەڕۆکی بانگیشەی “لە جیاتی هەموو جیهان شەری تیرۆر دەکەین”ە.
هەڵبەت ئەم جەنگە خیروبێری لۆکاڵیشی بۆ ناسیۆنالیزمی کورد لە ئاستی کوردستان و عێراقدا هەیە. ئەم دەسەڵاتە لەم چەنەد ساڵەی دواییدا چ لە ئاستی عێراق و چ لە ئاستی کوردستاندا لەگەڵ ئاستتەنگی بەرەوروبووە. لە سایەی ئەم شەڕەدا توانیوێتی قورسایی ئەو ئاستەنگیانە لەسەر خۆی کەم بکاتەوە. لەم فەزا جەنگیەدا هاوڵاتیانی کوردستان نەک هەر بۆیان سەختە یەخەی ئەم دەسەڵاتە بگرن بۆ خواست و مافەکانیان بەڵکو قەرزاربارن. تا “شەڕی دژی تیرۆر لە جیاتی هەموو جیهان” بەردەوام بێت چەک و پارە و پشتیوانی غەرب بەسەر حزبەکانی دەسەڵاتدا دەبارێ و دەتوانن خۆیان پڕچەکترو بنەمای دەسەڵاتیان پتەوتر بکەن. داعش و شەڕی داعش دەرفەتیان دەدات بۆ ئەوەی ئیمتیازێکی زیاتر لە حکومەتی ناوەندی وەرگرن. هەروەها لە پشتی پەردەی ئەم جەنگەوە جۆرەها سیناریۆ بەرێوەدەچێت؛ کوردستان کراوە بە مەیدانی تەراتێنی مافیاکانی قاچخچی چەک و بە فرۆکە هێنانوبردنی پێدەکرێت. تەنانەت بازرگانی کردن لەگەل خودی داعش بوە بە رێگایەکی بەدەستهێنانی پوڵ بۆ سەرمایەدارانی خاوەن پشتوپەنا لە ناو حزبەکانی دەسەڵات.
هینانەگۆڕێی پرسیارێک دەتوانێ یارمەتیدەربێت بۆ نیشاندانی ناوەرۆکی سیاسی ئەم جەنگەو ئامانجەکانی لە دیدی ئەمریکاو حکومەتی هەرێمی هاوپەیمانیەوە. ئەم جەنگە بەمجۆرە بڕیارە تا کەی بەردەوام بێت و کەی دەتوانێ داعش لەناوبەرێت یان لانیکەم دەریپەڕێنێ؟… باوەرناکەم هیچ پێشمەرگەو فەرماندەو سەرکردەیەکی ناسیۆنالیست وەڵامێکی خۆشبینانەی بۆ ئەم پرسیارە هەبێت. بەڵام ئەمە بۆ؟؟! لەبەر ئەوەی داعش لە شکان نایات؟ لەبەر ئەوەی چەکی داعش لەو هەموو چەکە پێشکەوتوترە کە لە دەستی ئەمریکادایەو بەسەر حکومەتی هەرێمیشدا باریوە؟ لەبەر ئەوەی چەتەکانی داعش زیاد لە پێویست جەربەزەن؟ ….نەخێر ئەمانە هیچیان راست نین، فڕوفیشاڵن، درۆن، ئەفسانەن. ئەمە پڕوپاگەندەی بێبنەمای من نیە، ژنان و پیاوانی دەست بە چەکی کلاسیکی لە کۆبانی ئەم راستیەیان بۆ هەموو جیهان سەلماندوەو ئیتر کەس ناتوانێ ئینکاری لەمە بکات. وەڵامی ئەم “بۆ”یە ئەوەیە کە حکومەتی هەرێم  و هاوپەیمانیە جیهانیەکەی بە رابەری ئەمریکا، نەک شەڕی شێلگیرانە بۆ لە ناوبردنی داعش ناکەن و ئەمە سیاسەت و بەرنامەیان نیە، بەڵکو یاریەکی سیاسی بە داعش و جەنگ لە دژی داعشەوە دەکەن. ئەم شەڕە بڕیارنیە بە لەناوبردنی داعش کۆتایی بێت، بەڵکو بریارە خزمەت بە سیاسەتی ئەمریکا لە عێراق و سوریاو ناوچەکە بکات و لەم چوارچیوەیەشدا تا ئەو جێگایەی بە داعش دەگەڕیتەوە ئاکامی مەنتقی و چاوەڕوانکراوی ئەم شەڕە دەتوانێ سەوداو سازان بێت لەگەل داعشێک کە خۆی لەگەڵ سیاسەتی ئەمریکا لە ناوچەکەدا بگونجێنێ و لەگەڵ دەستوپێوەندەکانی ئەمریکاش پێی لەبەڕەکەی خۆی درێژتر نەکات. ئەوکات رەنگە لە پرۆسیس و دەسەڵاتی سیاسی عێراقدا وەکو یەکێک لە لایەنەکانی نوێنەری سونە و لە سوریاشدا دورنیە وەکو ئۆپۆزیسیۆنێکی “شۆڕشگێڕ”ی جێگا مەبەستی ئەمریکاو غەرب بەرامبەر رژێمی ئەسەد پەسەندبکرێت.

جەنگی راستەقینە دژی تیرۆریزم:
چ شتێک لەوە ئاشکراترە کە تارومارکردنی داعش چەندە جەنگێکی سەربازیە لەوەش زیاتر نەکەمتر جەنگێکی سیاسیە؟ جەنگی توڕهەڵدانە لەو نەرێت و یاساو دامەزراوو ئایدۆلۆجی و حزب و دیوەخان و مزگەوت و ئاخوندە فتوادەرانەی کە رۆژانە بانگیشە بۆ رێبازی داعش دەکەن و داعش بەرهەمدەهێننەوە. دروست وەکو ئەوەی کانتۆنی جەزیرە بە جەسارەتەوە هەنگاوی بۆ هەڵگرتوە. بەڵام حزبەکانی دەسەڵات لە کوردستانی عێراق ٢٣ ساڵە  یاساو ئەحکامی ئیسلامیانەی داعش دەسەپێنن و بەدڵ و بە گیان دەیپارێزن. پرۆگرامی داعش بەشێکە لە پرۆگرامی خوێندنی هەرێمی کوردستان، بنەماکانی شەرع و رێبازی داعش بنەمای دەسەڵات و یاساکانی کوردستانە و کۆمەڵگای پێبەڕێوەدەبرێت، وەزارەتخانە و دەیان دامودەزگاو هەزاران فەرمانبەرو لێشاوێک لە پارە بۆ برەودان بە رێبازی ئیسلامی داعش تەرخانکراوە، ئاخوندە لۆمپنەکانی داعشی کوردی لە سلێمانی و هەولێرەوە لە سایەی دەسەڵاتی حکومەتی هەرێمدا جەسارەت دەکەن هەڕەشەی داعشیانە لە سالەح موسلم و کانتۆنی جەزیرە بکەن، دەزگاکانی ئەم حکومەتە ئەوەندە سەرقاڵی جێبەجێکردنی فتوا داعشیەکانن نایپەرژێنە سەر خواست و خزمەتگوزاریەکانی خەڵك. حزبەکانی کوردایەتی بە ناو حکومەتی بنەکەفراوانەوە دەستی لایەنە ئیسلامیەکانیان راکێشا بۆ ناو دەسەڵات و وەزارەتخانەیان خستە بەردەستیان، چونە پشتی ئەوەی کە وەزارەتی ژنانی عێراق بدرێت بە داعشە دەمامکدارەکانی کوردستان. لە کاتێکدا ئەگەر بڕیار بێت وەزارەتخانە یان دامەزراو یان تەنانەت  دەزگایەک بەراستی بۆ بچوکترین خزمەتی مەسەلەی ژن دامەزرێت، دەبێ بەر لەهەرشت بەرنامەی ئەوەی پیبدرێت کە چۆن ژنان لە دەستی تاوان و کۆنەپەرستی ئیسلامیەکان و یاساو نەرێتی دژی ژنی ئەوان بپاریزێت. کەچی لەم مەملەکەتەدا دنیاکە پێچەوانەیە، ژنان سپێردراون بە ئیسلامیەکان بۆ ئەوەی باش مشوریانبخۆن!!. ..لە پاڵ ئەم هەموو مەیداندان و دەستهێنانە بە ریشی کۆنەپەرستی و تیرۆریزمی ئیسلامیدا،  ئیتر شەڕیکی یەکلایەنەی سەربازی دژی داعش لەو جۆرەی ئێستا لە ئارادایە، دەبێت بە یاریەکی سیاسی و تا چەتەیەکی داعش لەبەیندەچێت دوو چەتەی تازەو زەمینەیەکی لەبارتر بۆ بەرهەمهاتنەوەی داعش دەخولقێنن.
جەنگی شێلگیرانە بۆ تەفروتوناکردنی داعش رێگاکەی ئاشکرایە، دەبێ بە پێچەوانەی کارنامەی ٢٣ ساڵ دەسەڵاتی حزبە ناسیۆنالیستەکان لە باوەشینکردن و داسەپاندنی نەرێتە ئیسلامیەکان، لانی کەم چاو لە کانتۆنی جەزیرە بکرێت و شەڕی سیاسی و کۆمەڵایەتی هاوکات لەگەڵ سەربازی لەدژی داعش و نەرێتەکانی بەرپابکریت. ئەگەر حکومەتی هەرێم ئەمکارە ناکات، مانای ئەوەیە نایەوێ شەڕی تەفروتوناکردنی داعش بکات. کەوایە خەڵکیش نابێت بە یاریەکەیان خۆشباوەڕبن، نابێ ئەم یاریەیان لێ قبوڵ بکرێت، نابێ رێگا بدرێت خوێنی پێشمەرگەی رۆڵەکانی ئەم کۆمەلگایە بکرێتە قوربانی ئەم یاریە سیاسیە. بۆ بەرپاکردنی جەنگێکی سەربازی شێلگیرانە بە مەبەستی تەفروتوناکردنی داعش پێویستە دەرس لە کۆبانی وەرگرێ، بزوتنەوەی بەرگری جەماوەری بەرێبخرێت، جەماوەری ژنان و پیاوانی چەکدارو رێکخراو بێتەمەیدانەوە. هاوشان لەگەل ئەمە پێویستە لە کانتۆنی جەزیرە دەرس وەرگیرێت بۆ بەرپاکردنی جەنگێکی سیاسی و کۆمەڵایەتی بە مەبەستی لەکارخستنی کارخانەکانی بەرهەمهێنانی داعش و داب و نەرێتی بەربەریانەی ئەم رەوتە ئینسانکوژە، بە مەبەستی هەڵپێچانی هەموو ئەو یاسا کۆنەپەرستانەی پشتیان بە نەریتی ئیسلامیانەی داعش بەستوە یان لەوەوە سەرچاوەدەگرن، بە مەبەستی داماڵینی دەمامک لەسەر روخساری داعشە دەمامکدارەکان و دەمکوتکردن و دەسکۆتاکردنیان لە دەسەڵات و لە کاری پشتی جەبهە بۆ داعشی بی دەمامک. ٢ی دێسەمبەر ٢٠١٤