hkkurdistan
جه‌مال موحسین
ئه‌وه‌ی تائێستا و به‌پێی ئه‌نجامی به‌رایی كۆمسیۆنی هه‌ڵبژاردنه‌كان ڕاگه‌یه‌ندراوه كه پێئه‌چێ دوائه‌نجامیش بێت، پارتی و یه‌كێتی یه‌كه‌م و دووه‌م و ئۆپۆزسیۆنی بۆرژوازیش، كه به‌هێزترینیان نه‌وه‌ی نوێیه، له‌دوای ئه‌وانه‌وه‌یه. ئه‌م ئه‌نجامه كه ده‌رخه‌ری ئه‌و ڕاستیه‌یه سیستمی سیاسی و ده‌سه‌ڵات بۆ چینی سه‌رمایه‌دار و پاره‌داران پارێزراو و وه‌ك خۆی ئه‌مێنێته‌وه (دیاره به‌جیا له‌وه‌ی كه ئاڵوگۆڕی جیهانی و ناوچه‌یی چ شتێكی تر ئه‌سه‌پێنێ)، له‌ولاشه‌وه تۆزقاڵه زه‌ڕڕه‌یه‌ك له واقعی ژیانی خه‌ڵكی كرێكار و زه‌حمه‌تكێش ناگۆڕێ. ئه‌وه‌ی كه‌مێك گۆڕانی به‌سه‌ردا هاتووه ژماره‌ی كورسی ئه‌م لایه‌ن و ئه‌و لایه‌نی پێكهێنه‌ری سیستمی ده‌سه‌ڵات و حوكمڕانی و نه‌یارانی هاوبه‌شیان له‌و سیستمه‌دایه.
له‌م نێوه‌دا براوه‌ی یه‌كه‌م له گۆڕێدا نییه، براوه‌ی سه‌ره‌كی چینی ده‌سه‌ڵاتدار و سه‌رمایه‌داره و به‌ناوی ’’ده‌نگی زۆرینه‘‘ وه ڕه‌وایه‌تی به‌خۆی داوه‌ته‌وه و درێژه به ده‌سه‌ڵاتدارێتی ئه‌دات. به‌مجۆره خۆیان وا نمایش ئه‌كه‌ن كه براوه‌ی سه‌ره‌كی و پێكهاته‌ی سه‌ره‌كی ده‌سه‌ڵاتن و ئه‌وان حكومه‌ت پێكئه‌هێنن و بۆ ٤ ساڵ یان زیاتر له‌وه وه‌ك تاشه‌به‌ردێك به‌سه‌ر دڵی كۆمه‌ڵگه‌وه ئه‌مێننه‌وه. ئه‌وه ئه‌وانن كه بڕیار ئه‌ده‌ن جه‌نگ بكه‌ن یان نا، نان و موچه بده‌ن یان نا، ئاخۆ كاره‌با و خزمه‌تگوزاری ته‌ندروستی و خوێندن و په‌روه‌رده و…هتد دابین ئه‌كه‌ن یان نا. سه‌رئه‌نجام ئه‌وه‌ی ده‌ستی لێنه‌دراوه جێگه‌وڕێگه‌ی ئه‌وانه وه‌ك سه‌ردار و سه‌روه‌ر و خه‌ڵكی كرێكار و زه‌حمه‌تكێشیشه وه‌ك ژێرچه‌پۆك و ژێرده‌سته و كۆیله‌ی كاری به‌كرێ بۆ كۆمپانیا ڕه‌نگاوڕه‌گه‌كانی پێكهاته‌كانی ئه‌و چینه باڵاده‌سته. كه‌واته داخوازی ئه‌وان كه ڕه‌وایه‌تی بده‌نه‌وه به سیستم و حوكمڕانی چینی سه‌رمایه‌دار و باڵاده‌ست وه‌ك خۆی به‌دیهاتووه و داخوازی خه‌ڵكی كرێكاری و بێبه‌شیش بۆ باشبوونی ژیان و ئارامی و ئاسوده‌یی و ئازادی له‌جێی خۆی و بێهاتنه‌دی ماوه‌ته‌وه. ئه‌وان كاری خۆیان ته‌واو كرد، جارێكی تر په‌نجه‌مۆری خه‌ڵكیان بۆ ڕاگرتنه‌وه و هێشتنه‌وه‌ی هه‌مان جۆر له ده‌سه‌ڵات و چه‌وسانه‌وه و ملكه‌چكردن وه‌رگرته‌وه و به‌مجۆره‌ش ئه‌یانه‌وێ جه‌ماوه‌ری ناڕازی بێئومێدانه بنێرنه‌وه ماڵه‌وه. كۆڵێك به‌ڵێنی سواو و درۆیینه‌شیان بۆ ئێوه به‌خشییه‌وه و هه‌روه‌ك پێشوو نه هیچ جۆرێك له ده‌سه‌ڵاتدارێتی كه له كوردستاندا هه‌یه و نه ئه‌مه‌ی ئێستاشیان، بوار و چوارچێوه‌یه‌كه بۆ جێبه‌جێكردنی به‌ڵێنه‌كانیان.
درۆ و درێژه‌دان به چه‌وسانه‌وه له‌وان و پرسیاری ئه‌وه‌ش له ئێمه خه‌ڵكی كرێكار و زه‌حمه‌تكێش كه لێره‌به‌دوا چی ئه‌كه‌ین و خه‌بات و ناڕه‌زایه‌تیه‌ك كه چه‌ند ساڵه له دژی ئه‌و ده‌سه‌ڵاته به خۆپیشاندان و مانگرتن و بایكۆت به‌ڕێمانخستووه چۆن درێژه‌پێئه‌ده‌ین!؟
ئه‌وان ئیتر دێنه‌وه سه‌ر ئه‌وه‌ی كه كام لایه‌نه و له‌گه‌ڵ كێی تردا ڕێكبكه‌وێ و كورسیه‌كانی ده‌سه‌ڵات و به‌مجۆره‌ش دزینی داهات و سه‌روه‌تی كۆمه‌ڵگه چۆن له‌نێوان خۆیاندا دابه‌ش بكه‌ن. به داخه‌وه ڕۆڵێك كه ئۆپۆزسیۆنی بۆرژوازی له پرۆسه‌ی هه‌ڵبژاردندا گێڕای ئه‌وه بوو خه‌ڵك خۆشخه‌یاڵ بكه‌ن كه بچن ده‌نگ بده‌ن و له‌ڕێی هه‌لبژاردن و په‌رله‌مانه‌وه ’’ده‌ستاوده‌ست به ده‌سه‌ڵات بكه‌ن!‘‘. به‌مجۆره ئه‌و ڕقه‌ی خه‌ڵك به‌رامبه‌ر ده‌سه‌ڵات و تاڵانچێتیه‌كه‌ی هه‌یبوو، بكرێ به قوڕگی لایه‌نه‌كانی تری ده‌ره‌وه‌ی ئه‌واندا، واته ئۆپۆزسیۆنی بۆرژوازی. ئۆپۆزسیۆنێك كه نه به‌رنامه‌ی له‌نێوبردنی كاری به‌كرێ و چه‌وسانه‌وه‌ی چینایه‌تی هه‌بووه و بگره نه‌ك له‌گه‌ڵ یه‌كسانی ژن و پیاودا نه‌بووه، به‌ڵكو هه‌رچی كۆنه‌په‌رستی هه‌یه له خۆی كۆكردبۆوه. بۆیه پیرۆزباییكردنی سه‌ركه‌وتنی هه‌ڵبژاردن بۆ ئه‌وان چ یه‌كێتی و پارتی و چ نه‌وه‌ی نوێ وه‌ك ئۆپۆزسیۆنێكی بۆرژوازی، له‌وێوه‌یه كه هه‌مووان توانییان جارێكی تر په‌نجه‌مۆری خه‌ڵك بۆ درێژده‌دان به سیستمه‌كه‌یان وه‌ربگرنه‌وه.
ئه‌وه‌ی كه ئه‌مه وه‌ك خه‌تایه‌ك بۆ خه‌ڵك حساب بكرێ، ناحه‌قییه. به‌ڵام جه‌ماوه‌ری به‌رینی كرێكار و بێبه‌ش و ناڕازی له‌لایه‌ك باجی نه‌بوونی ئاگاییه‌كی سیاسی ڕۆشن و سه‌ربه‌خۆ له باڵه جۆراوجۆره‌كانی بۆرژوازی به ده‌سه‌ڵاتدار و ئۆپۆزسیۆنه‌وه ئه‌ده‌ن. له‌لایه‌كی تریشه‌وه، به‌هۆی نه‌بوونی به‌دیلێكی بەهێزی ڕادیکاڵ كه له به‌رژه‌وه‌ندی چینایه‌تی ئه‌وانه‌وه خۆی له كۆمه‌ڵگه‌دا ده‌رخستبێ، خه‌ڵك له دژی یه‌كێتی و پارتی و خۆشخه‌یاڵانه جارێكی تر كه‌وته داوی ئه‌وه‌ی دوای شكستی گۆڕان، كۆلكه‌گۆڕانێكی وه‌ك نه‌وه‌ی نوێ تاقیبكاته‌وه. ئه‌وه‌ی ئه‌وانی گه‌یاند به‌وه‌ی شانازی به ده‌نگه‌كانیانه‌وه بكه‌ن، خودی نفوزی ئه‌وان نییه، به‌ڵكو قۆستنه‌وه‌ی ئه‌و ناڕه‌زایه‌تیانه‌یه كه خه‌ڵك لێره‌وله‌وێ به‌رامبه‌ر به نه‌دانی موچه، دانه‌مه‌زراندنی ده‌رچووانی زانكۆ و په‌یمانگاكان و گرێبه‌سته‌كان، گرانی و بێكاری و بێمافیه‌كان كردوویانه. خاڵێك كه پێویسته وه‌ك ئه‌زمونێك بۆ خه‌ڵك له دوای شكستی گۆڕان و دوباره سه‌ربه‌رزكردنه‌وه‌ی هێزێكی وه‌ك نه‌وه‌ی نوێ چاوی لێبكرێ ئه‌وه‌یه ئۆپۆزسیۆنی بۆرژوازی به باڵه ڕه‌نگاوڕه‌نگه‌كانیانه‌وه چ له فۆڕمی لیبراڵیدا بن یان ئیسلامی، خۆیان به ناڕه‌زایه‌تی خه‌ڵكدا هه‌ڵواسیوه تاكو له‌و سیستم و دۆخه بخۆن و كۆمپانیاكانی ئه‌وانیش پشكێکی زیاتری لە چه‌وسانه‌وه‌ی كرێكاران و زه‌حمه‌تكێشانیان به‌ربكه‌وێ.
خه‌ڵكی كرێكار و بێبه‌ش پێویسته له گۆشه‌نیگای ناڕەزایه‌تیه‌كانی له دۆخ و هه‌لومه‌رجی مه‌وجود و داخوازیه‌كانی بۆ ژیان و بژێوی باشتر ته‌ماشای هه‌ڵبژاردن و ئه‌نجامه‌كانی بكات. ئه‌وكات په‌ی به‌و هوشیاریه چینایه‌تیه زیاتر ئه‌بات كه كاری لێره‌به‌دوای زیاتر و زیاتر ئه‌بێت، ئه‌ویش به پێداگری و جه‌ختكردنه‌وه‌ی زیاتر بۆ ناڕه‌زایه‌تیه‌كان و بره‌وپێدانه‌وه‌یان.
له‌ئێستا به‌دواوه ئه‌و خه‌ڵكه زه‌حمه‌تكێشه‌ی كه به‌هه‌ر هۆیه‌كه‌وه بێت، چ به زۆر و ناچاركردن و هه‌ڕه‌شه‌ی نانبڕین و چ به خۆشخه‌یاڵیی ئه‌وه‌ی كه هه‌ڵبژاردن دۆخی چه‌وسانه‌وه‌یان ئه‌گۆڕێت، ده‌نگی پێداون، پێویسته له‌سه‌ر هه‌ر به‌ڵێنێك كه ئه‌و لایه‌نانه‌ی پێكهاته‌ی ده‌سه‌ڵات و ئۆپۆزسیۆنی بۆرژوازی پێیداون، یه‌خه‌یان بگرن. پێویسته له هه‌وڵی سه‌راسه‌ریكردنه‌وه‌ی ناڕەزایه‌تیه‌كاندا بین و به‌هه‌ر شێوازێك پێمانئه‌كرێ درێژه‌ی پێبده‌ین، به‌ڵام زه‌مانه‌تی خۆڕێكخستن له ڕێكخراوێكی جه‌ماوه‌ری سیاسیدا بكه‌ین. ڕێكخراوێك كه هه‌م ڕابه‌رایه‌تی و سه‌رپه‌رشتی ناڕه‌زایه‌تیه‌كان و فراوانكردنه‌وه‌یان بكات و هه‌میش جه‌ماوه‌ر بۆ ڕاماڵینی ئه‌و ده‌سه‌ڵاته و گرتنه‌ده‌ستی ده‌سه‌ڵات له‌لایه‌ن جه‌ماوه‌ری كرێكار و زه‌حمه‌تكێشه‌وه ئاماده و سازبكات.
٢٤ی ئۆكتۆبه‌ری ٢٠٢٤
