hkkurdistan
موحسین کەریم
لە پرۆسەی هەڵبژاردنەکانی تورکیادا، دوو بەرەی بەهێز، کە لە جەمسەرێکیاندا شۆڤێنیزمی ئیسلامی تورکی و لە جەمسەرەکەی دیکەیاندا شۆڤێنیزمی ناسیۆنالیستی تورکی وەستاوە، دەبینرێن. ئەمریکاو رۆژاوا بەهەموو ئیمکاناتێکی سیاسی و ڕاگەیاندنەوە لەپشتی بەرەی ناسیۆنالیستە تەقلیدیەکانی تورکەوە وەستاون کە کەمال کلیچدار ئۆغڵۆ نوێنەرایەتی دەکات. ئامانجیان لەم پشتیوانیە، لەهەلومەرجی ئێستای جیهاندا، شکستهێنانی ئۆردوگان و دورخستنەوەی تورکیایە لە جەمسەری ڕوسیاو چین. هەروەکو روسیا لەپشتی سەرخستن و مانەوەی ئۆردوگانە لە پۆستی سەرۆکایەتی ووڵاتدا، لەبەرئەوەی سەرەڕای ئەندامبوونی تورکیا لە پەیمانی ناتۆ، بەڵام لەسەر دەستی ئۆردوگاندا بەکردەوە لەبەرەی ڕوسیاو چین هەژمار دەکرێ و بوەتە مایەی سەریەشە بۆ ئەمریکاو وولاتانی ئەوروپا.
بێگومان ئەوەندەی پەیوەندی بە بەرژەوەندیەکانی خەڵکی کرێکارو زەحمەتکیشی تورکیاوە هەیە، هیچ کام لەم دوو لایەنە نەیارو ڕکابەرە و سیاستەکانیان بەقەدەر سەرە دەرزیەك نزیکایەتی نیە لەگەڵ خواست و ئومێدەکانی ئەواندا بۆ چارەسەری گرفتە ئابوریەکان و هەژاری لەڕادەبەدەر و باشبوونی ژیان و گوزەران و فراوانبوونەوەی ئازادیە سیاسیەکان، کە هەرئێستا کۆمەڵگای تورکیاو جەماوەری کرێکارو زەحمەتکێش لە خراپترین هەلومەرجدا ژیان بەسەر دەبەن. سەربەخۆ لە جەوهەری چینایەتی و پلاتفۆرمی سیاسی و ئابوری ئەو دوو بەرەیە، خەڵکی زەحمەتکێش و چینی کرێکاری تورکیا ئەزمونی دەسەڵاتداری هەردووکیان بە نرخی هەژاری و برسێتی و زیندان و کوشتن تاقی کردۆتەوە. حزبەکەی کمال کلیچدار ئۆغڵۆ( جەهەپە) و بەرەی ناسیۆنالیزمی تەقلیدی تورکی، دەیان ساڵ دەسەڵاتی سیاسی ئەو ووڵاتەیان بەدەستەوە بوو، تا پێش هاتنی دەسەڵاتی ناسیۆنال-ئیسلامی حزبی دادوگەشەپێدان و ئۆردوگان نزیکەی ٢٠ ساڵ لەمەوبەر. ئەوە دوو دەیەشە ئەزمونی دەسەڵاتی حزبی دادو گەشەپێدان(ئەکەپە) دەکەن. بەڵام ئەوەی جێی سەرنجە، لەم کێشمەکێش و جەمسەرگیریەدا لەنێوان دوو باڵی بۆرژوازی تورکی و دوو رەوتی ناسیۆنال- شۆڤێنزمی تورکی و ناسیۆنال-ئیسلامی شۆڤینیزمی تورکیدا، هەڵوێستی (پەیەدە)یە کە لەم پرۆسەیەدا لەپاڵ بەرەی ناسیۆنال- شۆڤینیزمی تورکیدا ڕاوەستاوەو پەیامی سەرکەوتنی پاڵیوراوی ئەوان، واتە کەمال کلیچدار ئۆغڵۆ، بەسەر ئوردوگاندا وەکو کرانەوەی دەرگای بەهەشت بەڕووی پرسی کورد و بەرژەوەندی سیاسی خەڵکی کوردزمانی تورکیا ناوزەد دەکات.
گومان لەوە نیە کە ئۆردوگان و دەسەڵاتی حزبەکەی و بزوتنەوەکەی، واتە ناسیۆنال-ئیسلامی تورکی، نەخشێکی گەورەی دیوە لە داسەپاندنی هەژاری و برسێتی و سەرکوتی سیاسی و کوشتار و زیندانیکردن و قەدەغەکردنی هەڵسوڕانی رێکخراوە کرێکاری و کۆمۆنیست و ئازادیخوازەکانی تورکیا، هەروەکو سیاسەتێکی دڕندانەو فاشیستانەی دژ بە خەڵکی کوردزمانی تورکیا پەیڕەوکردوەو بگرە لەدەرەوەی سنوری تورکیاشدا هەوڵی سەرکوتی هەرجۆرە جموجوڵێکی سیاسی کردوە کە پەیوەندیان بە پرسی کوردەوە هەبووبێت. بەڵام ڕەوتی ناسیۆنالیزمی تورکی و ئەتاتورکیزم و حزبەکەی کەمال کلیچدار ئۆغڵۆش لەماوەی دەسەڵاتداری خۆیاندا، ئەگەر لە ئۆردوگان و حزبی دادوگەشەپێدان زیاتریان نەکردبێ دژ بە خەڵکی کرێکارو زەحمەتکێشی تورکیاو خەڵکی کوردزمانی تورکیاو بگرە خەڵکی کوردزمانی وولاتەکانی هاوسنوری تورکیا، ئەوا کەمتریان نەکردوە. بگرە لە تاوانەکانیدا حزبی دادو گەشەپێدان وەکو میراتگری حزبەکەی کەمال کلیچدار ئۆغڵۆ هەژمار دەکرێ و پارێزگاری لە پێناسەی ناسیۆنالیزمی مەزنخوازی تورکی کردوە، بە بۆن و بەرامەی ئیسلامیەوە!
بەرنامەی کەمال ئۆغڵۆ و حزبی (جەهەپە) و بەرەی میللەت، چارەسەری پرسی کوردی تێدا نیە. ئەگەر بۆ کەمپینی هەڵبژاردن و قورسکردنی تای تەرازوی هاوسەنگی بەلای خۆیاندا، لەبەرامبەر ئۆردوگان و حزبەکەی و هاوپەیمانەکانیدا ئەمڕۆ پێویستیان بە دەنگی (هەدەپە) هەیە و رەنگە هەندێك بەڵێنی کاتی هەڵبژاردن بدەن، ئەوا گومان لەوەدا نیە کە دوای تەواوبوونی تای هەڵبژاردن، ئیتر بەرژەوەندیە سیاسی و ئابوری و ستراتیژیەکانی بۆرژوازی تورکی و ناسیۆنالیزمی مەزنخوازی تورکی کاری خۆی دەکات و بڕیارەکان و هەنگاوەکان دەستنیشان دەکات. هەدەپە لە بێئومێدی و داخرانی ئاسۆی سیاسیەوەو بەپێی خاسیەتە چینایەتیەکەشی وەکو بەشێك لە بزوتنەوەی سیاسی ناسیۆنالیزمی کورد لە تورکیا، بەناچاری پەنای بۆ تاکتیکێکی سیاسی بردوە کە خۆشی دڵنیا نیە لە ئاکامەکەی! ئەوەی لەم نێوەدا زیان دەکات و پەلکێشی یاریەکی سیاسی بێئاکام دەکرێ، خەڵکی کوردزمانی تورکیایە!
