hkkurdistan
ڕێبوارئەحمەد
بزوتنەوەی هەڵپێچانی جمهوری ئیسلامی تادێت زیاتر پەرەدەگرێت و خەڵکی ئیران لەسەر ڕێگای فەراهەمکردنی پێداویستیەکانی هەڵپێچانی ئەم رژێمە بەخێرایی بەرەوپێش دەڕۆن. ئێران بوەتە مەیدانی داهێنانی شۆڕشگێڕانەی ئەوتۆ کە هەموو جیهانی سەرسام کردوە، جیهان لەژێر کاریگەری توندی ئەو بزوتنەوە شۆڕشگێڕانەیەدا قەراری گرتوە. ژنان و لاوان و خەڵکی ستەمدیدە رۆژانە بەداهێنانی گەورە تین و تەوژم بە ئازادیخوازی و یەکسانیخوازی و مرۆڤدۆستی و ژیاندۆستی دەدەن، نەک هەر لە ئیران و نەک هەر لە ناوچەی رۆژهەڵاتی ناوەڕاست، بەڵکو لەئاستی هەموو جیهاندا. بەراستی و بەبێ زیادەڕۆیی جیهانی ئەمرۆ و فەزای فکری و سیاسی ئەمرۆ جیاوازیەکی زۆری هەیە لەگەڵ رۆژێک بەر لە ڕۆژی کوژرانی مەهسا ئەمینی بەدەستی جەلادانی رژێمی ئیسلامی. جیاوازی هەیە بەو مانایەی ئەمڕۆ مرۆڤایەتی ئومیدەوارترە، ژنان جێگایەکی بەرزتریان هەیە، ئاسۆی ئازادی روناکترە، فەزای فکری جیهان رادیکاڵتر و مودێڕنتر و ئینسانی ترە، ئیرادەی ئینسان بۆ نەخشاندنی ئایندەی خۆی بەهێزترە. لەم دوو مانگەدا خەڵکی ناوچەکە و هەموو جیهان لە ژنان و لاوان و خەڵکی شۆڕشگێڕی ئیرانەوە فێری زۆرشت بوون. فێری ئەوەبوون کە لە سەدەی بیستویەکیشدا سەرباری هەژمونی سەرمایەداری و دەوڵەتەکانی، سەرباری هەژمونی ملهوڕی عەسکەری و فکری و سیاسی دەوڵەتانی سەرمایەداری، سەرباری لە قاڵبدانی بیروهۆشی مرۆڤایەتی بە بیری قەدەرگەرایی و خورافی و حوکمی چارەنوس، هێشتا ئیرادەی ئینسان لەسایەی سەرکوتگەرترین رژێمی هاری سەرمایەدا، دەتوانێ و بگرە توانیویەتی بێتەمەیدانەوە و بە چۆکیدا بهێنێت و هەوڵدات بەدەستی خۆی چارەنوسی خۆی بنوسێت. ئەمرۆژانە جیهان ئەم راستیە بەرجەستە و مەزنە، بە کردەوە دەبێنێ و هیوا و ئومێد و هێزی لێوەردەگرێت.
بەڵام ئەمە هەموو شتەکە نیە! جمهوری ئیسلامی خەریکە تەفروتونا دەبێت و دەروات، چەند رۆژ و چەند مانگ زووتر یان درەنگتر، بەڵام هەموو جیهان چاوەروانی هەڵپێچانی دەکەن. روخانی جمهوری ئیسلامی لەرێگای شۆڕشێکەوە، روداوێکی زۆر لە گەورە گەورەترە، دەبێتە هەوێنی ئاڵوگۆرێکی زۆر گەورە لە ناوچەکە و تەنانەت جیهاندا. زۆر هاوکێشە دەگۆڕێت، تەنانەت هەڵدەگێڕێتەوە. هەرچۆن بە هاتنەسەرکاری ئەم رژێمە، گەردەلولێکی کۆنەپەرستانە هەموو ناوچەکە و جیهانی خستە ژێر کاریگەری خۆیەوە، کۆنەپەرستی و تیرۆریزمی ئیسلامی پەرەی گرت و بۆمب و چەقۆ و پەتی قەنارەی ئیسلامی سەدان هەزار جەستەی پارچەپارچە کرد و سەدان هەزار سەری پەراند، دەیان دەستەوتاقمی بکوژی ئیسلامی بەرەڵای گیانی مرۆڤایەتی کرد و بوونە مایەی هەراسانی و کارەساتی گەورە بۆ دانیشتوانی ناوچەکە وجیهان، بەهەمانشێوە روخانی ئەم رژێمەش دەبێتە مایەی گەردەلولی شۆڕش و شۆرشگێری و ئازادیخوازی و یەکسانیخوازی و سیکۆلاریزم، دەبێتە مایەی داخرانی ئاسۆی دەیان دەستەو تاقم و تەنانەت تەنگکردنەوەی ئاسۆی دەوڵەتانی ئیسلامی لە پانتایی دنیادا. لە تاقمە ئیسلامیە کۆنەپەرستە دژە ژنەکانی کوردستانەوە تا دارودەستەی شیعە و تەنانەت سونەی عێراق و سوریا و لوبنان و فەلەستین و هەموو دنیای عەرەب و وڵاتانی ناوچەکە، تا جۆرەها دەستەو تاقمی خوێنرێژ لە جیهاندا کە جمهوری ئیسلامی لەپشتی دەدان و نان و پارە و باروتی پێدەدان، خۆریان ئاوادەبێت و دەکەونە بەر نەفرەتی خەڵکەوە.
نە تەنها ئەوان بەڵکو حزبە دەسەڵاتدارەکانی کوردستانیش بە تایبەت ئەوانەیان کە لە رۆژانی خۆشی جمهوری ئیسلامیدا هاوپەیمان و چاولە دەستی بون، دەبێ خۆیان بۆ دژواری و ئاستەنگیەکانی دوای روخانی ئامادە بکەن و نرخی دۆستایەتیەکەیان لەگەل ئەم رژێمە پیس و چەپەڵەدا بدەنەوە. ئەگەر ئەو شۆڕشەی لەئێراندا بەڕێکەوتوە سەربکەوێت، هەموو ناوچەکە بەتایبەتی و هەموو جیهان بەگشتی دەکەونە بەر نەسیمی ئەو شۆرشە. هێزهاوسەنگی و دەرفەتێکی گەورە بۆ ئەو بزوتنەوانە دەرەخسێت کە هاوڕیگای شۆرشی خەڵکی ئیرانن، بۆئەوەی ئایندە و چارەنوسێکی درەوشاوە بۆ بەشەریەت بنوسن.
٢١ی نوڤەمبەر
